Foto: istockphoto.com
Kún astronomııasy zerthanasynyń málimetinshe, Kún dıskisiniń ortalyq bóliginde óte kúrdeli pishindi koronaldy sańylaý paıda bolǵan. Bul qurylym Kúnniń ońtústik jáne soltústik jarty sharlaryn túgel qamtyp jatyr. Qazirgi ýaqytta Kúnnen esken joıqyn jeldiń jyldamdyǵy sekýndyna 700 shaqyrymǵa jetti, bul qalypty kórsetkishten eki ese joǵary.
Ǵalymdardyń aıtýynsha, magnıt daýylynyń alǵashqy belgileri boljamnan bir táýlik buryn baıqala bastaǵan. Tún ortasynda G1 deńgeıindegi alǵashqy geomagnıttik aýytqýlar tirkeldi. Mamandar aldaǵy kúnderi jaǵdaıdyń odan ári kúrdelenýi múmkin ekenin eskertedi. Eger Jerge keletin plazma aǵyny tyǵyz ári birtekti bolsa, daýyl kúshi G2 deńgeıine deıin kóterilýi yqtımal.
Sańylaýdyń konfıgýrasııasy óte kúrdeli bolǵandyqtan, boljam turaqsyz bolyp otyr. Kún jeliniń mundaı joǵary qysymy Jerdiń qorǵanys qabatyn – magnıtosferany óte sezimtal etedi. Osy shaǵyn ózgeristerdiń ózi qaıtalama magnıt daýyldaryn týdyrýyna ákep soǵýy múmkin.
Astronomdar mundaı joǵary jyldamdyqtaǵy kún jeliniń áseri kem degende taǵy 2-3 táýlikke sozylatynyn habarlady. Bul kezeńde baılanys júıelerinde aqaýlar bolýy múmkin jáne meteosezimtal adamdardyń densaýlyǵyna basa nazar aýdarǵany jón.
