Foto: Ulttyq ulan
Áskerge shaqyrý kezinde sarbazdardyń egiz ekeni anyqtalsa, áskerı bólim qolbasshylyǵy olardy bir-birinen ajyratpaı, qatar qyzmet etýine jaǵdaı jasaıdy. Bul sheshim tek turmystyq qolaılylyq emes, áskerı ortadaǵy psıhologııalyq turaqtylyq pen ózara qoldaýdy nyǵaıtýdyń tıimdi úlgisi.
Ulttyq ulan qataryna byltyr Almaty oblysynan shaqyrtylǵan 22 jastaǵy Dıas pen Ilııas Tólepbergender búginde Otan aldyndaǵy boryshyn abyroımen ótep júr. Dıas «Sarbaz 2.0» baǵdarlamasy aıasynda joǵary oqý ornynda tegin bilim alý múmkindigine ıe bolyp, áskerı qyzmet pen bolashaq kásibı damý jolyn ushtastyra bildi.
Al 19 jastaǵy Elhan men Elshan Nýrıevter úshin áskerı qyzmet sporttaǵy jetistikterin jańa deńgeıge kóterýdiń múmkindigine aınaldy. Olar áskerge deıin de, ásker qatarynda da armrestlıng sport túrinen úzdikter qatarynan kórinip keledi.
Túrkistan oblysynan shaqyrtylǵan 19 jastaǵy Nursultan men Ersultan Berkishovter egiz bolǵanymen, syrtqy kelbeti men minez-qulqy bir-birine qatty uqsamaıtyn erekshe jup. Alaıda qyzmetke degen jaýapkershilik pen tártipke adaldyq olardy bir maqsatta toǵystyrady.
Shymkenttik Aman men Esen Qonarler – kópbalaly otbasynyń úlkenderi. Olardyń artynan ergen eki ul men tórt qyz bar. Búginde egiz sarbazdar №58 túzeý mekemesinde qaraýyldyq qyzmet atqaryp, otbasyna úlgi bolýmen qatar, el qaýipsizdigin qamtamasyz etýge óz úlesterin qosyp júr.
Ulttyq ulan sapynda bir mezette birneshe egiz juptyń qyzmet etýi – áskerı qurylymdaǵy adamgershilik, baýyrmaldyq pen áskerı tártiptiń úılesimdi kórinisi. Mundaı sırek jaıttar áskerı qyzmettiń tek qatań talaptarǵa emes, rýhanı tutastyqqa da negizdeletinin aıqyn dáleldeıdi.
