Delegasııa basshysy, Qarýly kúshter Ulttyq áskerı-patrıottyq ortalyǵynyń bastyǵy Arman Asenovtiń aıtýynsha, bul festıval ózge elderdiń mádenıetimen tanysý ári halyqaralyq baılanystardy nyǵaıtý úshin mańyzdy alańǵa aınalyp otyr.
Otandyq ujymnyń ónerine festıval uıymdastyrýshylary men kórermen qaýym jyly lebizin bildirdi. Máselen, Shveısarııa delegasııasynyń ókili general Erık Djýllıard áskerı jáne ulttyq áýen naqyshtaryn, saptyq symbat pen horeografııany úılestire bilgen ártisterdiń kásibıligin atap ótken.
Áskerı qyzmetshiler óz repertýarynda ulttyq naqysh bolýyna nazar aýdaryp, aldyn ala daıyndalǵan. Atap aıtqanda, olar Nurǵısa Tilendıevtiń, Temirhan Qojabekovtiń «Legenda o tabýne», Baqytjan Jelderbaevtyń «Shabyt shyńynda» shyǵarmalary men Allah Ya Omri Qatar patrıottyq ánin oryndady.
«Osyndaı joǵary deńgeıdegi festıvalge qatysý – biz úshin úlken jetistik ári zor jaýapkershilik. Kórermenderdiń áserine qarap, el atynan abyroımen óner kórsettik dep oılaımyn», deıdi Ulttyq áskerı-patrıottyq ortalyǵy Ortalyq áskerı orkestriniń bastyǵy podpolkovnık Maqsat Shákenov.
Festıvalge Ulybrıtanııa, Iordanııa, Irlandııa, AQSh, Oman, Túrkııa shyǵarmashylyq ujymdary men Qatardyń elıtalyq áskerı-mýzykalyq orkestrleri qatysqanyn aıta keteıik. Sheteldik sapardan oralǵan mýzykanttardy 19132 áskerı bólimniń áskerı aerodromynda áriptesteri qarsy alyp, Qorǵanys mınıstrligi Tárbıe jáne ıdeologııalyq jumys departamenti bastyǵynyń orynbasary, polkovnık Vıtalıı Adamovıch Otanymyzdyń abyroıyn asqaqtatyp qaıtqan óner ıelerine alǵys bildirdi.
