Foto: istockphoto.com
Jasandy ıntellekt jáne sıfrlyq damý birinshi vıse-mınıstri Rostıslav Konıashkın Májilis kýlýarynda málimdegendeı, «Kundelik» júıesiniń buzylýy týraly aqparat ázirge rastalǵan joq. Onyń aıtýynsha, mamandar muqııat tekserý júrgizip jatyr, biraq aldyn ala málimetter derekterdiń aǵyp ketý faktisin kórsetpegen.
«Tekserý áli de jalǵasyp jatyr. Bastapqyda usynylǵan aqparat dáleldenbedi. Qorytyndy nátıjeler daıyn bolǵanda, biz nemese Oqý-aǵartý mınıstrligi resmı jaýap beremiz», dedi Konıashkın.
Eske salsaq, 12 jeltoqsanda anonımdi Telegram-arnalardyń birinde 2025 jyldyń qyrkúıegine deıingi ózekti derekter – oqýshylardyń aty-jóni, týǵan kúnderi men mektepteri jelige shyǵyp ketti degen habarlama taraǵan edi.
Vedomstvo eger zań buzýshylyq anyqtalsa, kináliler tıisti jazaǵa tartylatynyn eskertti. Al «Kundelik» kompanııasy bul jaǵdaıdy joqqa shyǵaryp, óz betinshe ishki tehnıkalyq aýdıt júrgizip jatqanyn jetkizdi.
