Foto JI kómegimen jasalǵan
Elimizdiń Atom energııasy jónindegi agenttigi men Japonııanyń Atom energııasy jónindegi agenttigi joǵary temperatýraly gazben salqyndatylatyn reaktorlar salasyndaǵy zertteýler men ázirlemelerge qatysty, sondaı-aq qoldanbaly zertteýlerdi damytýǵa arnalǵan yntymaqtastyq týraly memorandýmdar jasasty. Bul qujattar atom energetıkasynyń ozyq tehnologııalaryn ıgerý men qaýipsizdikti arttyrýǵa negiz bolady.
Buǵan qosa elimizdiń Ulttyq ıadrolyq ortalyǵy japondyq birqatar ǵylymı jáne óndiristik qurylymdarmen ózara túsinistik týraly memorandýmǵa qol qoıdy. Anyǵynda Marubeni Utility Services Ltd. kompanııasymen ǵylymı baılanystardy keńeıtý, Muroosystems Corporation kompanııasymen paıdalanylǵan ıadrolyq otyn men radıoaktıvti qaldyqtarmen jumys isteý salasyndaǵy yntymaqtastyqty damytý kózdelgen. Sondaı-aq Fýkýı ýnıversıtetiniń Iаdrolyq ınjenerııa ǵylymı-zertteý ınstıtýtymen atom energııasyn beıbit maqsatta paıdalaný baǵytyndaǵy ǵylymı-zertteý men tájirıbelik-konstrýktorlyq jumystardy birlesip júrgizý jóninde ýaǵdalastyqqa qol jetkizildi.
Japonııa álemdegi eń iri AES-ti iske qosý týraly sheshim qabyldady
Budan bólek, Iаdrolyq fızıka ınstıtýty, Japonııanyń Atom energııasy jónindegi agenttigi men Marubeni Utility Services Ltd. arasynda joǵary temperatýraly gazben salqyndatylatyn reaktor otynyn sáýlelendirý synaqtaryn júrgizýdiń tehnıkalyq-ekonomıkalyq negizdemesin ázirleýge arnalǵan kommersııalyq shart jasaldy. Bul qadam saladaǵy naqty jobalardy iske asyrýǵa jol ashady.
Qol qoıylǵan qujattar Qazaqstan men Japonııa arasyndaǵy atom energııasyn beıbit maqsatta paıdalaný, ǵylymı-tehnologııalyq zertteýler men ınnovasııalyq ázirlemeler salasyndaǵy strategııalyq seriktestiktiń nyǵaıyp kele jatqanyn aıǵaqtaıdy. Sondaı-aq eki eldiń ózara senimge negizdelgen baılanysyn jańa deńgeıge kóterip, uzaqmerzimdi ári ornyqty yntymaqtastyqqa berik negiz qalaıdy.
