Elordada jáne elimizdiń basqa qalalarynda mereke qarsańynda san alýan is-sharalar uıymdastyrylady. Sahnalarda súıikti oryndaýshylardyń konsertteri ótse, teatrlar men mádenı ortalyqtar merekelik qoıylymdar usynyp, balalarǵa arnalǵan oıyndar, attraksıondar jáne ártúrli qyzyqty baǵdarlamalar uıymdastyrylady.
Astananyń alty aýdanynda 34-ten astam lokasııada muz aıdyndary, túrli-tústi fotoaımaqtar jáne shaǵyn sáýlettik formalar ornatylǵan. Jalpy qala boıynsha 57 syrǵanaq pen muz aıdyny bar.
Saryarqa aýdanynda 12 syrǵanaq pen 4 muz aıdyny bar. Qalalyq alańda úlken syrǵanaq pen muz aıdyny ornatylyp, merekelik fotosýretterge arnalǵan taqyryptyq aımaqtar men shynaıy shyrsha qoıylǵan. Bógenbaı batyr dańǵylyndaǵy gúlzarda ortasynda úlken shyrshasy bar muz aıdyny ashyldy. «Kóktal» saıabaǵynda ártúrli jas sanatyna arnalǵan eki syrǵanaq pen jappaı syrǵanaýǵa arnalǵan úlken muz aıdyny bar.
Baıqońyr aýdanynda negizgi oıyn-saýyq nysandary «Jastar» saraıynyń aýmaǵynda ornalasqan. Munda muz aıdyny, syrǵanaq jáne jańa jyldyq shyrsha qoıylǵan. J.Táshenev kóshesindegi Atatúrik atyndaǵy saıabaqta muz aıdyny men syrǵanaq bar. Abaı dańǵylyndaǵy «Qalamgerler alleıasynda» syrǵanaq, shyrshalar, jańa jyldyq ınstallıasııalar men shaǵyn sáýlettik formalar ornatylǵan.
Esil aýdanynda qysqy serýenniń basty ortalyǵy dástúrli túrde EKSPO aýmaǵy bolyp otyr. Munda muz aıdyny, syrǵanaq jáne merekelik shyrsha qoıylǵan. Sondaı-aq Prıgorodnyı jáne «Baǵystan» turǵyn alaptarynda syrǵanaqtar jumys isteıdi. Jańa jyldyq shyrshalar Túrkistan kóshesi jaǵyndaǵy Botanıkalyq baqta, Qazaq radıosy kóshesiniń boıynda, Dostyq kóshesi men Nurjol býlvarynyń qıylysyndaǵy jańa skverde bezendirilgen. «Jetisý» saıabaǵynda syrǵanaq pen shyrsha ornatylǵan.
Almaty aýdanynda qysqy demalysqa arnalǵan birneshe oryn uıymdastyrylǵan. «Sana» sport kesheniniń artyndaǵy Aqbulaq ózeniniń jaǵalaýynda muz aıdyny men syrǵanaq jumys isteıdi. «Jeruıyq» saıabaǵynda da syrǵanaq pen muz aıdyny paıdalanýǵa berilgen.
Saraıshyq aýdanynda syrǵanaqtar, muz aıdyndary men ártúrli bıiktiktegi shyrshalar «Qazaq Eli» alańynda, Prezıdent saıabaǵynda, Jumysshy mamandyqtary alleıasynda jáne «Nurly Jol» temirjol vokzaly aýmaǵynda ornalastyrylǵan.
Nura aýdanynda taqyryptyq shaǵyn sáýlettik formalar qoıylyp, fotoaımaqtar bezendirilgen. Sondaı-aq tórt muz aıdyny jumys isteıdi:
- uzyndyǵy 213 metr bolatyn sheńberli muz aıdyny Ortalyq saıabaqta;
- «Astana-Arena» stadıony aýmaǵynda;
- «Ǵashyqtar» saıabaǵynda;
- Úrker turǵyn alabynda.
Budan bólek, Ortalyq saıabaqta, «Býharest» saıabaǵynda, «Astana-Arena» aýmaǵynda jáne Úrker turǵyn alabynda tórt muz syrǵanaǵy bar.
Al, Almaty qalasyndaǵy is-sharalar kelesideı:
31 jeltoqsanda Astana alańynda saǵat 18:00-den 00:30-ǵa deıin basty jańa jyldyq konsert ótedi. Konsertte Maqpal Isabekova, Álisher Karımov, Aqylbek Jemeneı, Beıbit Qorǵan, Ringo toby, Ninety One toby, Ayree, Astra toby, Dakelot, Dáýlet Janbolat syndy tanymal estrada juldyzdary óner kórsetedi. Konserttiń erekshe bólimi – DJ BATTLE. Bul jerde dıdjeıler jańa jyldyq áýender men tanymal hıtterdi zamanaýı árleýde oryndap, keshke erekshe dınamıka men atmosfera syılaıdy.
Qazaq memlekettik sırkinde 11 qańtarǵa deıin «CHRISTMAS STARS» atty jańa jyldyq shoý-premera kórsetiledi. Bul qoıylym meıirim, dostyq pen ǵajaıypqa toly sıýjetke qurylǵan jáne eresekter men balalarǵa arnalǵan. Baǵdarlamada qolǵa úıretilgen ekzotıkalyq qustar men janýarlar – totyqustar, shımpanzeler, attar, shaǵyn tuqymdy ıtter jáne aıý qyzy Iаna óner kórsetedi.
29 jeltoqsan men 4 qańtar aralyǵynda Memlekettik qýyrshaq teatrynda «Mýltı Jańa jyl» atty merekelik oıyn-saýyq baǵdarlamasy ótedi. Balalar túrli ǵalamdarǵa saıahat jasap, Lılo men Stıch, Esh pen Pıkachý, Kıkı men Narýto sııaqty tanymal keıipkerlermen tanysyp, meıirimdi Aıaz Atanyń kómegimen ertegiler álemine jol tartady.
Sonymen qatar, qalanyń 8 aýdanynda arnaıy bezendirilgen oryndarda kún saıyn Aıaz Ata men ertegi keıipkerler qatysatyn merekelik konsertter, oıyn-saýyq baǵdarlamalary men ınteraktıvti oıyndar ótedi.
Aıta keteıik, 19 jeltoqsan kúni Astanada bir mezette 40-tan astam jańa jyldyq shyrshanyń shamy jaǵyldy. Qalanyń barlyq aýdanynda muz aıdyndary, syrǵanaqtar, fotoaımaqtar, shaǵyn sáýlet nysandary, jármeńkeler jáne konserttik baǵdarlamalar uıymdastyryldy.
Osylaısha, jańa jyl merekesi qala turǵyndary úshin tek kóńil kóterý ǵana emes, sonymen qatar dostarymen, otbasy múshelerimen birge este qalarlyq sátterdi ótkizýge taptyrmas múmkindik.
