Foto: pinterest.com
2025 jyly Qazaqstanǵa «Astana» halyqaralyq qarjy ortalyǵy arqyly 6 mlrd AQSh dollary kóleminde ınvestısııa tartyldy. Bul ótken jylmen salystyrǵanda shamamen 3 mlrd dollarǵa artyq. Investısııalyq ósimge negizinen portfeldik salymdar serpin berdi.
Jalpy tartylǵan qarjynyń 4 mlrd dollary portfeldik ınvestısııalarǵa tıesili bolsa, taǵy 2 mlrd dollar AHQO qatysýshylarynyń tikeleı salymdary esebinen qalyptasty. Sarapshylardyń pikirinshe, bul kórsetkishter halyqaralyq ınvestorlardyń Qazaqstannyń qarjy ınfraqurylymyna degen senimi nyǵaıyp kele jatqanyn ańǵartady.
Investısııalyq aǵynnyń ulǵaıýy AHQO-nyń kiris bóliginiń ósýine de tikeleı áser etti. Atap aıtqanda, komıssııalyq tólemder, tirkeý jáne servıstik alymdar, sondaı-aq bırjalyq operasııalar ortalyqtyń qarjylyq kórsetkishterin aıtarlyqtaı jaqsartty.
Bul úderiste AHQO janyndaǵy Halyqaralyq qor bırjasynyń róli erekshe. 2025 jyly bırjadaǵy saýda aınalymy 2 mlrd dollarǵa jetti. Bul kapıtal naryǵy quraldaryna, sonyń ishinde aksııalar men oblıgasııalarǵa degen suranystyń artqanyn kórsetedi.
Jalpy alǵanda, 2018 jyldan beri AHQO arqyly Qazaqstan ekonomıkasyna 20 mlrd AQSh dollary kóleminde ınvestısııa tartylǵan. Bul qarjy eldiń qarjy sektoryn damytýǵa, ınvestısııalyq klımatty jaqsartýǵa jáne halyqaralyq kapıtalmen yqpaldastyqty kúsheıtýge baǵyttalǵan mańyzdy resýrs sanalady.
