Foto: 24kz
Almaty oblysynan shyqqan 22 jastaǵy egizder Dıas pen Ilııas Tólepbergender merzimdi áskerı qyzmetke shamamen bir jyl buryn shaqyrylǵan. Tarazdaǵy qyzmet barysynda sarbazdar jaqsy nátıjeler kórsetti. Sonyń arqasynda aǵaıyndylardyń biri – Dıas joǵary oqý ornynda tegin bilim alýǵa arnalǵan bilim grantyn ıelenetin boldy.
«Biz áskerı boryshymyzdy abyroımen atqaryp, turǵyndardyń tynyshtyǵyn kúzetip júrmiz. Áskerde qyzmet etý – árbir er azamattyń mindeti. О́skeleń urpaqqa úlgi bolamyz dep oılaımyn», dedi merzimdi áskerı qyzmet sarbazy Dıas Tólepbergen.
Egizi Ilııas Tólepbergen tek áskerı qyzmet atqaryp qana qoımaı, polısııa qyzmetkerlerine qoǵamdyq tártipti saqtaýǵa kómektesetinin atap ótti.
Túrkistan oblysynan kelgen Aman men Esen Qonar, sondaı-aq Nursultan men Ersultan Berkishovter túzeý mekemesindegi tártipke jaýapty. Syrt kelbetteri uqsas bolǵanymen, minezderi ártúrli bul jigitterdi toptyq rýh pen qyzmetke degen jaýapkershilik biriktiredi.
Olarmen bir bólimde Elhan men Elshan Nurıevter de qyzmet etedi. Jigitter qol kúreske qyzyǵady jáne jetistikterin birge qyzmet atqaratyn áriptesterine kórsetip júr.
Aqtóbeden Tarazǵa kelgen Aqnıet pen Ádilet Tóremuratovtar jańa áskerı ortaǵa tez beıimdeldi. Qazir olar Taraz garnızonynyń baılanys polkinde ekinshi aı qyzmet atqaryp júr. Aqnıet pen Ádilet árdaıym birge: bir synypta oqyǵan, bir partada otyrǵan, endi áskerde de qatar júr, tek mektep dápterleriniń ornyn áskerı konspektiler almastyrǵan.
«Áskerı qyzmet bizge unaıdy. Ár kúnimiz qyzyqty ótedi. Armııaǵa óz erkimizben keldik. Minez ben tártip dál osy jerde qalyptasady dep oılaımyn», dedi merzimdi áskerı qyzmet sarbazy Ádilet Tóremuratov.
Batalon komandıriniń orynbasary Rahymjan Aryntaevtyń aıtýynsha, ata-analar kóbine uldaryn áskerge jiberýge qorqady. Al munda bir otbasydan birden eki bala qyzmet etip júr. Olardyń jaýapkershiligi mol ári ashyq-jarqyn.
«Egiz bolǵandyqtan, olardy bólmeý týraly sheshim qabyldandy. О́zara qoldaýdyń arqasynda olar ujymǵa tez sińisti», dep jaýap berdi ol 24.kz baǵdarlamasyna.
2025 jyldyń kúzinde О́ńirlik «Ońtústik» qolbasshylyǵynyń áskerı bólimderine merzimdi áskerı qyzmetti óteý úshin shamamen 2 myń sarbaz kelgen. Qyzmet qorytyndysy boıynsha úzdik atanǵandar eldegi 70 joǵary oqý ornynan tegin bilim alýǵa arnalǵan bilim granttaryna ıe bolady.
