Sýret oblystyq tótenshe jaǵdaılar departamentinen alyndy
О́ńirlik tótenshe jaǵdaılar departamentiniń habarlaýynsha, Ertis ózeniniń Pavlodar oblysy bóliginde muz ótkelderi ázirge ashylǵan joq. Qysqy ýaqytta ózen jaǵalaýyndaǵy aýyldarǵa jemshóp, otyn tasýǵa paıdalanylatyn muz joldary ádette alty birdeı aýdanda jumys isteıdi. Aýdandar arasy jaqyndaı túsip, alys-beris artady.
– Ishki ister mınıstrliginiń 2015 jylǵy 19 qańtardaǵy №34 buıryǵyna sáıkes, muzdyń qalyńdyǵy 25 santımetrden assa avtokólikterdiń ótýine, 10 santımetrden assa jaıaý adamnyń júrýine ruqsat beriledi. Anyqtaǵanymyzdaı, barlyq jerde muz qabaty belgilengen normatıvtik qalyńdyqqa jete qoımaǵan. Aýa temperatýrasynyń turaqty túrde tómendeýine, sý aıdyndarynda muz qatý úderisiniń ári qaraı jalǵasýyna baılanysty óńirde muz ótkelderin kezeń-kezeńimen ashý josparlanǵan. Departament jergilikti atqarýshy organdarmen birlesip muz ótkelderin uıymdastyrý, ashýǵa arnalǵan oryndardy aıqyndaıdy. Ázirge bul múmkin emes, – dep málimdedi departamentten.
2024–2025 jyly qys kezeńinde oblys aýmaǵynda 13 muz ótkeli jumys istegen. Onyń 8-i avtokólikke, ózgesi jaıaý júrginshiler men júk kólikterine arnalǵan. Atap aıtqanda, Maı aýdanynda – 2, Aqqýlyda – 1, Tereńkólde – 4, Ertiste – 1, Jelezınde – 4, Pavlodar aýdanynda 1 ótkel ashyq bolǵan.
Árbir muz ótkelin ashý ýákiletti mekemelerdiń muz qalyńdyǵyn ólsheý, tekserý jumysyn júrgizip, tıisti ruqsatyn alǵannan keıin ǵana júzege asyrylady. Resmı túrde ashylǵanǵa deıin atalǵan jerlerde muz ústine shyǵýǵa qatań tyıym salynady. Mınıstrlik bekitken arnaıy buıryqta ótkelderden túsetin jerlerde eki jaqtan da ornatylǵan qalqandarda arnaıy qysqy qural-jabdyqtar (ilgekter, satylar, qutqarý sheńberleri, bóreneler) qoıylýy kerektigi eskertilgen. Buǵan qosa kireberisterde ótkeldiń ataýy, jumys ýaqyty, ony qurý men ustaýǵa jaýaptylardyń derekteri kórsetilgen mańdaıshalar ornatylady. Sol turǵyda barlyǵy talapqa saı bolmasa, muz ótkelderi ashylmaıtynyn eskerý kerek. Bul jumystarǵa jergilikti atqarýshy organdar jaýapty.
Qutqarý qyzmetteri turǵyndarǵa muz ótkelderiniń ashylý merzimi aýa raıy jaǵdaıyna, muzdyń qalyptasý qarqynyna tikeleı baılanysty ekenin eskertedi. Kereký óńirinde jeltoqsan aıynda qatty aıazdar bola qoıǵan joq. Qańtar aıazdy bolsa, Ertis ózeniniń muzy qalyńdap, ótkeldermen jolaýshylardyń árli-berli qatynaýyna múmkindik týady.
Pavlodar oblysy
