Sheteldiktermen latyn tilinde sóılese alatyn, saýatty dinı qyzmetker bolǵan aǵasy oǵan saýat ashýdan dáris oqyǵan. Onyń ústine sol dáýirde qyz balalar úshin kóp oqýdyń da qajeti shamaly edi. Onyń alǵashqy áńgimesi nebári 13 jasynda jaryq kórdi. Talaı jylǵy tynymsyz eńbeginiń arqasynda ol birneshe roman, áńgimeler, ádebı maqalalar, sahnalyq pesalar men óleńder jınaǵyn oqyrmanǵa usyndy. Onyń alǵashqy romany «Sardınııa gúli» 1892 jyly jarııalandy.
Jazýshynyń kóptegen shyǵarmalarynda ozbyrlyq kúshter, moraldyq tańdaýlar, qumarlyq pen adam álsizdigi sııaqty taqyryptar kórinis tabady. Grasııa Deledda óz shyǵarmalaryn jazý barysynda Sardınııadaǵy balalyq shaǵynan, tereń tarıhı tamyry bar kóne dástúrlerden jáne otbasy músheleriniń qaıǵyly oqıǵalarynan áser alǵany anyq.
1926 jyly Grasııa Deledda «ıdealıstik rýhta jazylǵan týyndylary arqyly týǵan dalasynyń ómirin aıqyn beınelep, jalpyadamzattyq máselelerdi tereńdikpen sýrettegeni úshin» ádebıet salasyndaǵy Nobel syılyǵyna ıe boldy.
