2025 jyldyń 9 qańtary kúni klassık qalamger, ádebıet tarıhyn san ǵasyrǵa tereńdetken ǵalym, halyq jazýshysy Muhtar Maǵaýın 85 jasqa qaraǵan shaǵynda AQSh-tyń Merılend shtatynda kóz jumdy. Ádebı ortany alǵashqy týyndylarymen moıyndatyp, sanaly ǵumyryn sóz ónerine baǵyshtaǵan alyp tulǵaǵa muhıttyń arǵy jaǵynan topyraq buıyrdy. Qazaq jurtshylyǵy Maǵaýınniń qazasynan es jıyp úlgermeı jatyp, arada úsh kún ótkende abaıtanýshy ǵalym, fılolog, professor Mekemtas Myrzahmetuly 95 jasynda baqıǵa bet túzedi. Alash buqarasy Abaı shyǵarmalaryn jańa qyrynan taldap, ǵylymı aınalymǵa engizgen abyz aqsaqalmen qımaı qoshtasty.
Aqpan aıynyń 22-juldyzynda ádebıetimizdiń ujdany hám aıbary sanalatyn klassık jazýshy, álem elderinde pesalary sahnalanǵan dramatýrg, Memlekettik syılyqtyń laýreaty Dýlat Isabekov 84 jasynda máńgilik mekenine kóshti. 11 naýryzda Nurǵısa Tilendıevtiń jary, «Qulager», «Alty jasar Alpamys», «Qoshtasqym kelmeıdi», «Jambyldyń jastyq shaǵy» sekildi kórkem fılmderde ártúrli rólderdi somdaǵan akter, «Qaıran meniń Nurekem», «Qaratalym», «Mahambet baba» atty án-kúıler jazǵan sazger, Qazaqstannyń eńbek sińirgen ártisi Darıǵa Tilendıeva, al, 19 naýryzda «Qazaq kədesi», «Qazaq minezi», «Qazaq tanyǵan gúlder», «Qazaq aspan esebi» syndy kitaptardyń avtory, etnograf Bolat Bopaı dúnıe saldy.
Jylan jylynyń 22 sáýirinde qazaq ádebıetiniń taǵy bir alyp báıteregi qulap, halqymyz klassık qalamger, dramatýrg, Qazaqstannyń Eńbek Eri Ákim Tarazıdan aıyryldy. 28 sáýirde 85 jastaǵy kórnekti folklortanýshy, Ulttyq Ǵylym akademııasynyń akademıgi, fılologııa ǵylymdarynyń doktory, Memlekettik syılyqtyń laýreaty Seıit Qasqabasov baqılyq boldy. 10 mamyr kúni 81 jasqa qaraǵan shaǵynda Qazaqstannyń halyq jazýshysy, Memlekettik syılyqtyń laýreaty, aqyn Temirhan Medetbek dúnıeden ótti.
Sondaı-aq qazaq buqarasy 22 mamyrda elimizge belgili jýrnalıst, sport kommentatory Dıas Ahmetshárip, 10 maýsymda jazýshy, aýdarmashy, pýblısıst Maqsot Izimuly, 17 shildede «Almas qylysh» fılmindegi Kereı han rólin somdaǵan belgili akteri Qaırat Kemalov, 18 shildede Qazaqstannyń halyq jazýshysy, belgili aqyn, dramatýrg, talantty sazger Israıl Saparbaı, 21 shildede belgili jýrnalıst, jazýshy, otandyq aqparat keńistiginde óz qoltańbasyn qaldyrǵan Muhtar Túmenbaı, 4 tamyzda ǵaryshker, Halyq qaharmany Talǵat Musabaev, 21 tamyzda qazaq beıneleý óneriniń kórnekti ókili, Qazaqstannyń eńbek sińirgen qaıratkeri, Memlekettik syılyqtyń laýreaty, professor Aǵymsaly Dúzelhanov, 23 tamyzda «Egemen Qazaqstan» gazetiniń tilshisi, belgili jýrnalıst Aıgúl Ahanbaıqyzy, 30 qazanda jýrnalıst, fılologııa ǵylymdarynyń kandıdaty, Qazaqstannyń eńbek sińirgen qaıratkeri Maqsat Táj-Murat, 11 qarashada kórnekti mádenıet qaıratkeri, fılolog, ádebıet synshysy, rejısser jáne ssenarıst Ǵalym Dosken, 15 qarashada «Qazaqtyń kórnekti aqyny, Memlekettik syılyqtyń ıegeri Kúlásh Ahmetova, 18 qarashada Qazaqstannyń eńbek sińirgen qaıratkeri, «Qurmet» ordeniniń ıegeri, Qalıbek Qýanyshbaev atyndaǵy Qazaq ulttyq mýzykalyq drama teatrynyń negizin qalaýshylardyń biri Rymkesh Omarhanova men feldsher Uldana Myrzýan (Astanada kópqabatty úıdiń qaptamasy qulaǵanda azamattarǵa jedel járdem kórsetýge baryp, aýyr jaraqat alyp, qaza tapty), 3 jeltoqsanda kórnekti qoǵam qaıratkeri, Ulttyq ǵylym akademııasynyń akademıgi, elimizdegi dıalektıkalyq logıka mektebiniń negizin qalaǵan Jabaıhan Ábdildın, 21 jeltoqsan-da keńestik jáne qazaqstandyq kıno jáne teatr akteri, KSRO halyq ártisi, Qazaqstannyń memlekettik syılyǵynyń laýreaty Asanáli Áshimov, 26 jeltoqsanda «Meniń atym – Qoja» fılminde basty róldi somdaǵan belgili akter, ssenarıst, kınodramatýrg Nurlan Segizbaev syndy tulǵalardan aırylyp, qara jamyldy.
Áıgili Máshhúr Júsip bir joqtaýynda: «Keýendeı bu dúnıege az kún qonyp...» depti. Rasy solaı-aý.
«О́nerlige ólim joq» deıtin qazaq halqy bıyl júz jyldyqtarda bir týatyn Alashtyń osyndaı azamattaryn aqtyq saparǵa attandyryp, jylan jylynyń jylnamasyn japty.
