Máýlen Áshimbaev kezdesýge qatysýshylarǵa iltıpat bildirip, ótken jyl sporttyq is-sharalarǵa toly bolǵanyn jáne qazaqstandyq atletter jarqyn jeńisterge qol jetkizgenin atap ótti. Bul jetistik sportshylar men jattyqtyrýshylardyń úılesimdi jumysynyń jáne otbasylar men jankúıerlerdiń qoldaýynyń nátıjesi ekeni aıtyldy.
«О́tip bara jatqan 2025 jyl otandyq bochcha úshin nátıjeli boldy jáne elimizde bul sporttyń damýyna serpin bergen jańa múmkindikterge jol ashty. Qazaqstanda alǵash ret Astana World Boccia Challenger halyqaralyq týrnıri uıymdastyryldy. Bul elimizdiń parasport tarıhyndaǵy eń mańyzdy oqıǵalardyń biri boldy. Sondaı-aq paraatletterimiz halyqaralyq jarystarda top jaryp, júldege ilikti. Sportshylarymyzdyń jigeri men tabandylyǵynyń arqasynda qazir Qazaqstan quramasy bochchadan álemdik reıtıngte 18-orynda tur. Al Ortalyq Azııada absolıýtti kóshbasshymyz. Bul jetistikte bochchany serik etken árqaısyńyzdyń úlesińiz bar. Biz sizderdi maqtan tutamyz jáne qoldaýdy jalǵastyra beremiz. Aldymyzda óńirlerde bochchany damytý, jańa jarystar, onyń ishinde elimizde bochchadan Álem kýbogi jolyndaǵy saıys ótkizý, Qazaqstannyń álemdik reıtıngtegi pozısııasyn odan ári nyǵaıtý sııaqty jańa mindetter tur», dep Senat tóraǵasy sportshylarǵa, jattyqtyrýshylarǵa, ata-analarǵa jáne jankúıerlerge alǵys bildirdi.
M.Áshimbaev atap ótkendeı, Memleket basshysy elimizde múgedektigi bar azamattar úshin teń múmkindikter qalyptastyrýǵa únemi basa mán berip keledi. Bul baǵytta keshendi reformalar iske asyrylyp, múddeli taraptarmen júıeli jumys júrgizilýde. Inklıýzıvti qoǵam qurý jolyndaǵy osyndaı ózara is-qımyldyń mańyzdy jetistikteri men nátıjeleriniń biri Astanada Inklıýzıvti sport ortalyǵynyń ashylýy ekeni sózsiz. Jańa keshen erekshe qajettiligi bar balalarǵa óz múmkindigin júzege asyryp, jańa dostar tabýǵa yqpal etedi jáne ortaǵa, eresek ómirge beıimdelýge jol ashady.
«Memleket basshysynyń bastamasymen salynǵan Inklıýzıvti sport ortalyǵy jaı sport nysany ǵana emes. Bul – teń múmkindikter, damý, qarym-qatynas jáne ózara qoldaý keńistigi. О́tken aptada ortalyqqa Prezıdent Qasym-Jomart Toqaev keldi. Sonyń nátıjesinde elimizdiń barlyq óńirinde osyndaı ınklıýzıvti sport ortalyqtaryn qurý týraly tapsyrma berildi. Bul – biz, ıaǵnı parasportshylar, ata-analar, jattyqtyrýshylar, federasııa músheleri men seriktester úshin úlken jetistik. Osy rette sizderge elimizdegi ınklıýzıvti sportty damytýǵa qosqan úlesterińiz ben qajyrly eńbekterińiz úshin taǵy da alǵys aıtamyn. Barshańyzdy Jańa jyl merekesimen shyn júrekten quttyqtaımyn! Kele jatqan 2026 jyl elimizge jańa jetistikter men jeńister ákelsin», dedi Senat tóraǵasy.
