Tramptyń aıtýynsha, operasııa AQSh quqyq qorǵaý organdarynyń qatysýymen júzege asqan. Ol bul týraly Truth Social áleýmettik jelisinde jazyp, tolyq aqparatty Florıda shtatyndaǵy Mar-a-Lago rezıdensııasynda ótetin baspasóz máslıhatynda jarııalaıtynyn aıtty.
CBS News dereginshe, Madýrony ustaý operasııasyn AQSh armııasynyń arnaıy jasaqtaǵy Delta Force bólimshesi júrgizgen.
Sonymen qatar Venesýela vıse-prezıdenti Delsı Rodrıges memlekettik telearna efırinde Madýro men onyń jubaıynyń qazirgi ýaqytta qaıda ekenin bilmeıtinin málimdedi. Al AQSh Memlekettik departamenti Madýronyń qylmystary úshin jaýap beretinin habarlady.
Buǵan deıin Karakasta jarylystar tirkelip, AQSh Venesýela aýmaǵyndaǵy birqatar áskerı nysandarǵa soqqy jasaǵany habarlanǵan. Venesýela bıligi bul áreketterdi áskerı agressııa dep baǵalap, elde tótenshe jaǵdaı rejımin engizdi.
AQSh-tyń áreketterin Kýba, Iran jáne Kolýmbııa synǵa aldy. Kolýmbııa prezıdenti Gýstavo Petro BUU men Amerıka memleketteri uıymyn shuǵyl otyrys ótkizýge shaqyrdy.
