Úkimet byltyrdan beri energetıkalyq jáne kommýnaldyq nysandardy jappaı jańǵyrtýǵa kirisken. Bul jumys ábden tozǵan ınfraqurylymdy retke keltirýmen ǵana shektelmeıdi.
«Uzyndyǵy júzdegen shaqyrym bolatyn ınjenerlik jeliler men elektr qýatyn taratatyn jeliler salýymyz kerek. Búgingi tańda osy aýqymdy jobanyń esep-qısaby ázirlenip jatyr», dedi Prezıdent.
Memleket basshysy qabyldanǵan sharalardyń alǵashqy nátıjeleri de bar ekenin jetkizdi. Qaýipti jaǵdaıda turǵan jylý elektr stansııalarynyń sany aıtarlyqtaı azaıǵan.
Sonymen birge Prezıdent ınfraqurylymdy jóndeýmen shektelý jetkiliksiz ekenin, saladaǵy jumys tásilin túbegeıli ózgertý qajettigin basa aıtty. Onyń pikirinshe, basty mindet – ınvestısııa tartýǵa jol ashyp, naqty naryqtyq tetikterdi qalyptastyrý.
«Energetıka jáne turǵyn-úı kommýnaldyq sharýashylyǵy kez kelgen memlekettiń ómir súrýine asa qajetti tuǵyr sanalady. Bul negiz shaıqalsa, basqasy túgel kúıreıdi», dedi Memleket basshysy.
Qasym-Jomart Toqaev sońǵy ondaǵan jyl boıy bul saladaǵy júıeli máselelerge tıisti deńgeıde kóńil bólinbegenin de jasyrmady. Sonyń saldarynan kommýnaldyq sharýashylyq bıýdjetke úzdiksiz salmaq salatyn aýyr júıege aınalǵan.
Prezıdent suhbatta tarıf saıasatyna da arnaıy toqtaldy. Onyń aıtýynsha, elektr energııasy men janar-jaǵarmaıdyń jasandy túrde arzan bolýy qarapaıym halyqqa emes, iri kásiporyndar men deldaldarǵa tıimdi bolǵan.
«Tarıftiń tómen bolýy qarapaıym tirlik keship jatqan adamdarǵa paıdaly degen jalǵan senimnen arylatyn ýaqyt jetti. Is júzinde bul – aýqatty azamattarǵa jasyryn túrde beriletin sýbsıdııa», dedi Qasym-Jomart Toqaev.
Memleket basshysy áleýmettik ádildikti qamtamasyz etý úshin ataýly qoldaýǵa kóshý qajet ekenin atap ótti. Iаǵnı, memleket kómekti shynymen muqtaj azamattarǵa ǵana kórsetýge tıis.
«Kim qansha tutynsa, sonsha tóleıdi, qoldaýǵa shynymen zárý adamdarǵa ǵana kómek beriledi. Tarıfter ádiletti bolýy kerek, ıaǵnı «neǵurlym kóp tutynǵan, soǵurlym kóp tóleıdi» degen qaǵıdat berik ornyǵýǵa tıis. Men osyndaı naqty mindet qoıyp otyrmyn», dedi Prezıdent.
Qasym-Jomart Toqaevtyń aıtýynsha, bul baǵytta alǵashqy oń ózgerister baıqalyp otyr. Sý men elektr qýatyn únemdep paıdalanatyn turǵyndar úshin eń tómen tarıf qoldanylýda. Mundaı tásil resýrstardy ádil bólip, zamanaýı ınfraqurylym men tıimdi energetıka júıesin qalyptastyrýǵa múmkindik beredi.
