Qazaqstan Qarýly kúshteriniń áskerı qyzmetshileri AQSh-tyń Arızona shtatynda ótip jatqan halyqaralyq «Best Warrior» baıqaýynda úzdik nátıjeler kórsetip jatyr.
Jyl saıyn Arızonadaǵy Kemp Navaho áskerı bazasynda uıymdastyrylatyn bul bedeldi dodaǵa bıyl AQSh-tyń jeti shtatynan, sondaı-aq Fıdjı, Gýam, Tonga jáne Fılıppınnen kelgen úzdik jaýyngerler qatysýda.
Bıyl Qazaqstannyń namysyn 54835-A áskerı bóliminiń 3-synypty serjanty Aslan Darhan men 18404 áskerı bóliminiń 3-synypty gvardııa serjanty Raýan Toqtarbekov qorǵap jatyr. Ekeýi de buǵan deıin respýblıkalyq jáne halyqaralyq deńgeıdegi áskerı jarystarda úzdik nátıje kórsetken tájirıbeli mamandar.
Baıqaý baǵdarlamasy
«Best Warrior» saıysy 10 negizgi baǵyt boıynsha ótedi:
- Armııalyq jaýyngerlik fıtnes testi
- Taktıkalyq medısına
- Qarý túrlerinen (M-240V, M-4, M-17) atý
- Túngi kúzet pen jergilikti jerdi baqylaý
- Azımýtpen qozǵalý jáne kartamen jumys
- Arnaıy áskerı jabdyqpen 22 shaqyrymdyq marsh júgirý
- Patrýldeý jáne jaýyngerlik jattyǵýlar
Qazaqstannyń áskerı qyzmetshileri baıqaýda AQSh armııasynyń qarý-jaraǵyn qoldanyp, sheteldik normatıvterdi oryndasa da joǵary kásibılik tanytyp keledi. Atap aıtqanda, 3-synypty serjant Aslan Darhan 800 metr qashyqtyqty 2 mınýt 5 sekýndta júgirip ótip, Arızona shtatynyń Ulttyq gvardııasy tarıhyndaǵy rekordty jańartty.
18 mamyrǵa deıin jalǵasatyn halyqaralyq baıqaý Qazaqstan Qarýly kúshteriniń kásibı deńgeıin taǵy bir márte dáleldep otyr. Áskerı daıyndyq pen jaýyngerlik qabilettilikti baǵalaıtyn mundaı dodada elimizdiń ókilderi naǵyz kásibı jaýyngerler ekenin kórsetti.
