Magıstraldyq sý taratqysh jobasy qala úshin jaı ǵana ınfraqurylym emes. Ol iske qosylǵanda Talǵar eski qubyrlardan qutylyp, turaqty ári jetkilikti aýyzsýǵa qol jetkizýi tıis edi. Biraq qurylys aıaqtalmaı, bul úmit keıinge ysyrylyp keledi.
«AMANAT» partııasy fraksııasynyń múshesi Maksım Rojınniń aıtýynsha, joba ýaqytynda aıaqtalmaı otyrǵan basty sebep − qarjynyń tolyq bólinbeýi.
– Qazirgi tańda Talǵar qalasynda bar bolǵany 4300 tekshe metrlik rezervýarlyq qýat jumys istep tur. Bul, ásirese jaz mezgilinde, qala úshin jetkiliksiz. Al jańa júıe tolyq iske qosylǵan kezde qosymsha 7600 tekshe metrge deıin sý jetkizýge múmkindik bar. Joba aıasynda tórt rezervýar salynǵanymen, sý sapasyn baqylaýǵa arnalǵan zerthananyń qurylysy da jarty jolda toqtap qalǵan. Onyń ishindegi negizgi jabdyqtar áli ornatylmaǵan, sebebi qarjy bólinbegen, – deıdi depýtat.
Joba 50 myńǵa jýyq turǵyndy aýyzsýmen qamtýy kerek. Jalpy quny − 4,6 mlrd teńge. Alaıda qurylysty tolyq aıaqtaý úshin qajet shamamen 1,7 mlrd teńge áli kúnge deıin bıýdjetten bólinbegen. Bul qarjyǵa sýdy hlorlaý júıeleri, zerthanalyq quraldar men negizgi tehnologııalyq jabdyqtar alynýy tıis.
– Dál osy jabdyqtar ornatylmaıynsha nysandy paıdalanýǵa berý múmkin emes. Másele tek qurylys kóleminde emes, sýdyń sapasy men turǵyndardyń qaýipsizdigine tikeleı baılanysty. Nysandy 2026 jyldyń shilde aıynda aıaqtaý josparlanǵan. Alaıda ol úshin negizgi jabdyqtar men materıaldardy bıyl satyp alý qajet. Áıtpese, merdigerdiń aıtýynsha, jobanyń quny qymbattap, iske asyrý merzimi taǵy da sozylyp ketýi múmkin. Sondyqtan oblystyq bıýdjetten jetispeı turǵan qarajatty ýaqyt ozdyrmaı bólý máselesin kóterip otyrmyz, – dedi Maksım Rojın.
Qurylys toqtaǵan saıyn salmaq eski júıege túsip otyr. Ásirese jaz aılarynda másele ýshyǵady: sý qysymy tómendeıdi, keı aýdandarda aýyzsý saǵattap, tipti kúndep berilmeıdi.
Talǵar turǵyny Ahat Soltanqulov bul qıyndyqtyń qarapaıym halyq úshin kúndelikti kúızeliske aınalǵanyn jasyrmaıdy.
– Jazda jaǵdaı tipti qıyndaıdy. Ásirese 9 qabatty úılerdiń joǵarǵy jaǵyna sý múlde kóterilmeıdi, qysym joq. Sýǵa jarymaı qalatyn kúnder bolady. Keńdala men Aqdala aýylyndaǵy saıajaılardyń jaǵdaıy tipten qıyn. Qala kún saıyn ósip jatyr, al sý júıesi baıaǵy qalpy. Shynymyzdy aıtsaq, ábden sharshadyq. Endi osy sý taratqyshty tezirek bitirip, iske qossa eken dep kútemiz. Basqa úmit qalmady, – deıdi ol.
Májilis depýtattary Talǵardaǵy magıstraldyq sý taratqyshty áleýmettik mańyzy bar strategııalyq joba retinde turaqty baqylaýda ustaıtynyn málimdedi. Sebebi bul tek qurylys nysany emes − ondaǵan myń adamnyń kúndelikti tirshiligi men qaýipsizdigi tikeleı osy sýǵa táýeldi.
