Bir jaǵynan, talantty jas ónerpazǵa elordalyq biregeı teatrdyń sahnasy bóten emes. Ol osyndaǵy balalar stýdııasynda oqyǵan. Sondaı-aq «Toska», «Bogema», «Týrandot» syndy birqatar operalarda óner kórsetken.
– Mýzyka mektebiniń vokal synybyn bitirdim. Sodan keıin anam meni «Astana Operanyń» hor stýdııasyna berdi. Osynda alǵash ret opera álemimen jaqyn tanystym. Ustazym Altynǵanym Ahmetovanyń jetekshiligimen birneshe qoıylymǵa qatystym. Teatr prımasy Jupar Ǵabdýllınanyń oryndaýyndaǵy Týrandottyń «In questa reggia» arııasyn alǵash ret onymen bir sahnada turyp estidim. Bul – men úshin jarqyn estelik bolyp qaldy. Shynymdy aıtsam, Pýchchını mýzykasynyń ásemdigi, orkestrdiń aýqymdylyǵy men rejısserlik qoıylymnyń keremet úılesimi meni erekshe sezimge bóledi. Kózime jas aldym. Osy sátten opera teatryna degen mahabbatym oıana bastady, – dedi opera ánshisi.
Ázıza Omarova – Italııanyń Novara qalasyndaǵy Gvıdo Kantellı atyndaǵy memlekettik mýzykalyq konservatorııasyn támamdaǵan. Qazir ol Dj.Verdı atyndaǵy konservatorııanyń magıstratýrasynda bilim alyp jatyr. Sonymen birge daryndy ónerpaz Italııanyń Chıvıtanova-Marke qalasyndaǵy Dj.Rossını teatrynda V.A.Mosarttyń «Bári osylaı jasaıdy» operasynda Despınanyń, Komo qalasyndaǵy qoǵamdyq teatr sahnasynda A.Bassınıdiń «Týranda» operasyndaǵy Adelmanyń partııasyn somdaǵan.
Aıta keteıik. «Piccolo» teatry tanymal jobasy aıasynda «Jibek saty» operasy elordalyq óner ordasynda 2019 jyldan beri tabysty qoıylyp keledi.
