Qanat Islam qarsylasyn nokaýtpen jeńdi (vıdeo)

ASTANA. 24 naýryz. Búgin túnde WBA Fedelatin versııasy boıynsha chempıondyq ataǵyn qorǵaǵan qazaqstandyq boksshy Qanat Islam kolýmbııalyq Orlando De Hesýs Estradany 4-raýndta nokaýtpen jeńdi. Bul týraly Vesti.kz portaly habarlady. «Orta salmaqta óner kórsetýshi qazaqstandyq boksshy Qanat Islam kásipqoılar rınginde 19-shy ret jeńis toıyn toılady. Dúısenbi, 23 naýryz kúni 30 jastaǵy qazaqstandyq kolýmbııalyq Orlando De Hesýs Estrada,ǵa qarsy urysta WBA Fedelatin versııasy boıynsha chempıondyq ataǵyn qorǵady», - delingen habarlamada. Jekpe-jek Kolýmbııanyń Barankılıa qalasynda ótti. Urystyń alǵashqy mınýtynan bastap Qanat qarsylasyn soqqynyń astyna aldy, biraq ol da birneshe týra soqqy jasaı aldy. Ekinshi raýndta qazaqstandyq básekelesin kindikten tómen uryp alyp, bir upaıynan aıryldy. Úshinshi raýndta Islam eki ret kolýmbııalyqty tizerlep otyryp qalýǵa májbúr etti – ol ekeýinde de nokdaýn aldy», - dep jazdy basylym. Tórtinshi raýndtyń basynda Qanat sol qolynyń qarymymen qarsylasyn taǵy da rıngke ushyryp túsirdi. Referı nokdaýn ýaqytyn tolyq sanap shyqty. Shaıqas qaıta jalǵasty. Biraq tóreshi sálden keıin urysty toqtatyp, qazaq jigitiniń jeńgenin jarııa etti. Osymen Qanat Islam óziniń 19-shy shaıqasyn ótkizdi. Ol bulardyń 16-synda aıqasty merziminen buryn aıaqtaǵan. Ázirge birde-bir ret jeńilip kórgen joq. Damır Qojamqul. https://youtu.be/S1TMfidv9Po