Qazaqstan saıttaryna shet elder hakerleri shabýyl jasap jatyr

ASTANA. 24 naýryz. Sońǵy eki kúnnen beri birqatar shet elderde turatyn hakerler Qazaqstan saıttaryna joıqyn shabýyl jasap jatyr. Bul týraly óziniń mánbesine súıengen ras.kz habarlady. Qazir elimizdiń saıt-portaldaryn talqandap tastaýǵa kiriskenderdiń Ázerbaıjan, Túrkııa, Iran jáne Brazılııa memleketterinde turatyn hakerler bolyp otyrǵany anyqtaldy. Olardyń arasynda, ásirese, aldyńǵy eki eldegi buzaqylardyń belsendilikteri joǵary. Sarapshylar hakerlerdiń búginge deıin elimizdegi 11 saıtqa shabýyl jasap, olarǵa ártúrli zalal keltirgenderin aıtyp otyr. Biraq hakerler saıttardyń tek basqy betterine ǵana tıisip otyrǵan sııaqty. Al olardyń basqa materıaldary men arhıvterin qıratyp, búldirgenderi ázirge baıqalmaıdy. Soǵan qaraǵanda, olardyń maqsattary ınternet-resýrstardy talqandap ketý emes, tek ózderiniń qoldarynan ne keletinin baıqatyp, qyr kórsetip qoıý ǵana sııaqty. Alaıda, portaldardyń bastapqy betin ózgerte alýdyń ońaı nárse emes ekenin de eskergenimiz jón. Oǵan qoly jetkender saıt tóńireginde bilgenderin isteı alady. Sondyqtan resýrstardy hakerler shabýyldarynan qorǵaýdyń barlyq amaldaryn jasap baǵýlaryńyz kerek. Murat Aıtqoja.