• 24 Naýryz, 2015

Ystambul áýejaıynda Reseı akteri ushty-kúıli joǵalyp ketti

306 ret

kórsetildi

2 mın

oqý úshin

Egemen Qazaqstan

ASTANA. 24 naýryz. Túrkııada Máskeýdiń «Satırıkon» teatrynyń qyzmetkeri Mark Ishmýhametov jumbaq kúıde joǵalyp ketti. Týǵan-týystary odan 20 kúnnen beri hat-habar ala almaı otyr. Izdeý sharalaryna Ystambuldaǵy Reseı konsýldyǵy da aralasty. Alaıda, áli naqty derek joq. Bul týraly vesti.ru habarlady. Týystarynyń aıtýynsha, Ishmýhametov Túrkııaǵa 3 naýryzda teatrdyń shyǵarmashylyq quramymen birge ketken. Trýppa Ystambul arqyly Brazılııaǵa ushýy kerek bolǵan. Sebebi, teatrdyń Latyn Amerıkasynda gastroldik sapary josparlanǵan. Aldyn ala belgili bolǵan málimetterge súıensek, Ishmýhametov tólqujatyn joǵaltyp alýyna baılanysty áýejaıdyń tranzıttik aımaǵynda qalyp qoıǵan. 9 naýryzda teatr ujymy Brazılııadan oralǵan kezde Markpen baılanysqa shyǵa almaǵan. Áýejaıdan da tappaǵan. Arada bir apta ótken kezde áleýmettik jeliler arqyly izdeý jarııalaǵan. Olar Markpen sońǵy sátke deıin habarlasyp turǵan. «4 naýryz kúni uıaly telefonyna qońyraý shalǵanymyzda tutqany bógde adam kóterdi. Aǵylshynshasy sonshalyqty jaqsy emes eken. Onyń aıtqanynan uıaly telefondy taýyp alǵanyn uqtyq», – deıdi áriptesteriniń biri. Joǵalǵan teatr qyzmetkeriniń dostary Túrkııa polısııasyna jáne Reseıdiń Ystambuldaǵy konsýldyǵyna habarlasty. «Ol jaqtyń polısııasy Marktiń áýejaıdan tabylmaǵanyn jáne Túrkııadan basqa elge shyqpaǵanyn aıtty. Sebebi, ol shekarany kesip ótpegen. Bul jaıt bizdi qatty alańdatyp otyr. Sebebi, tranzıttik aımaqtan adamnyń joǵalýy múmkin emes», – deıdi Ishmýhametovtyń qurbysy. Marktiń Túrkııa shekarasynan eshqaıda shyqpaǵanyn Ystambuldaǵy Reseı konsýldyǵynyń baspasóz-attashesi Andreı Egorov ta rastap otyr. «Eger adam áýejaıǵa kelip turyp, tranzıttik aımaqta tólqujatyn joǵaltyp alsa, ol sol jerden eshqaıda kete almaıdy. Degenmen, sol aımaqty búginge deıin san márte qarap, teksergenimizben ony taba almaı otyrmyz», – deıdi Andreı Egorov. Izdeý jumystaryna Ankaradaǵy Reseı elshiligi de aralasýda. Degenmen, bul is ázirge jumbaq kúıinde qalyp otyr. Elaman Qońyr. Derek: vesti.ru. Sýret: euromag.ru.