Mamandardyń aıtýynsha, «Fizmat Al Olympiad» dodasy – jasandy ıntellekt, baǵdarlamalaý jáne derekterdi taldaý salasyndaǵy bilim men tájirıbelik daǵdyny dáripteıtin iri saıystardyń biri. Osy jyly halyqaralyq baıqaýǵa jeti memleketten kelgen úzdik komandalar qatysyp, ózara kil myqtyny anyqtady.
Qatysýshylar keltirgen derekke júginsek, baıqaýdyń irikteý kezeńiniń ózi tartysty ótken kórinedi. Bilim dodasyna qatysýǵa nıet bildirgen úmitkerlerdiń ishinen bar bolǵany 150 oqýshy ǵana kelesi kezeńge joldama alǵan. Al qorytyndy kezeńde baq synaǵan elý komandanyń qaı-qaısysy bolsyn, óz joblaryn shegelep kelgen kil myqty ujymdar sanatyna jatady. Olardyń qataryna engen tarazdyq bilim alýshylar da halyqaralyq olımpıadaǵa úlken daıyndyqpen kelgenin dáleldeı bildi.
Almaty qalasyndaǵy respýblıkalyq fızıka-matematıka mektebiniń bazasynda uıymdastyrylǵan fınaldyq kezeńde kil myqtylar jınalǵany anyq. Munda bilim dodasyna qatysýshylar praktıkalyq tapsyrmalardy oryndady. Naqtyraq aıtsaq, jasandy ıntellekt modelin qurý, derekterdi óńdeý jáne ońtaıly sheshim shyǵarý sekildi kúrdeli mindetterdi sheshýge den qoıdy.
«Halyqaralyq deńgeıde ótken bilim básekesi qatysýshylar úshin úlken tájirıbe alańyna aınalǵany anyq. О́zimizdiń osy kúnge deıin jıǵan bilimimizdi bir tekserip alýǵa múmkindik týdy. О́zge elden kelgen oqýshylarmen básekege túsý – zor jaýapkershilik. Sol jaýapkershilik júgin aıqyn sezindik.
Daıyndyq úderisi kezinde birshama qıyndyq týyndaǵan edi. Keıbir tapsyrmalardyń soǵan saı qıyn bolǵany ras. Alaıda komanda retinde judyryqtaı jumylyp, barlyq kezeńde kúrdeli tapsyrmany birlesip sheshýge kúsh saldyq. Bekem birligimiz aýyz toltyryp aıtarlyqtaı jetistikke jetýimizge sebep bolǵan sekildi. Bilikti ustazdarymyz men ardaqty ata-analarymyzdyń demeýi men qoldaýy da bizdi qanattandyrdy», dedi Nurasyl Serikov.
Taraz
