Sýret: kazfootball.kz
- «Astana» veloklýby jańa maýsymdy jasyl qurlyqta bastaýda jón kórip, qazir Adelaıdadaǵy «Týr Daýn Ander» kópkúndiginde óner kórsetip jatyr. 30 qańtarda «Serf Kost Klassıkke» qatysady. 1 aqpanda «Keıdel Evanstiń» týrnırinde baq synaıdy. Bul básekelerde «Astananyń» Aaron Geıt (Jańa Zelandııa), Florıan Kaıamını, Alessandro Romele, Davıde Toneattı, Sımone Velasko (Italııa), Marko Shrettl (Aýstrııa), Darren van Bekkým (Nıderland) syndy veloshabandozdary óz ónerlerin ortaǵa salady.
- 29 qańtar – 1 aqpan aralyǵynda AQSh-tyń Solt-Leık-Sıtı qalasynda ótetin jasóspirimderdiń álem birinshiligine qatysatyn elimizdiń short-trekshileri belgili boldy. Amerıkaǵa attanatyndar tizimine Temirlan Joldas, Anastasııa Galechına, Bogdan Vehov, Gúldana Jalmuhan, Pavel Soı, Polına Omelchýk, Qasymbek Asylhan, Nurııa Alpysbaı syndy daryndy sportshylar endi.
- «Footrankings» portaly 2026–2027 jylǵy fýtbol maýsymyndaǵy ÝEFA Chempıondar lıgasynyń birinshi irikteý kezeńinde Almatynyń «Qaıraty» qaı komandalarmen jolyǵýy múmkin ekenin jarııa etti. Olardyń qatarynda «Shemrok Rovers» (Irlandııa), «KýPS» (Fınlıandııa), «Vıkıngýr Reıkıavık» (Islandııa), «Rıga FK» (Latvııa), «KI Klaksvık» (Farer araldary), «Flora Tallınn» (Estonııa), «Kaýno Jalgırıs» (Lıtva), «ML Vıtebsk» (Belarýs), «Iberııa 1999» (Grýzııa) syndy klýbtar bar.
- Kásipqoı boksty serik etken Aıdos Medet (13-0, 9 KO) 23 qańtarda AQSh-tyń Long-Bıchinde judyryqtasady. Qarsylasy – domınıkandyq Dannıs Agýero Arıas (20-4, 17 KO). Ekinshi jartylaı jeńil salmaqta ótetin báseke alty raýndqa eseptelgen.
- Omanda ústel tennısinen WTT Contender Muscat týrnıriniń shymyldyǵy túrildi. Bul jarysta Lın Shıdýn (Qytaı, álemdik reıtıngte №2), Lıan Szınkýn (Qytaı, №7), Benedıkt Dýda (Germanııa, №13), Darko Iorgıch (Slovenııa, №15), Patrık Fransıska (Germanııa, №20), Anton Kellberg (Shvesııa, №27), Omar Assar (Mysyr, №28), Shı Sıýnıao (Qytaı, №13), Chen I-Szın (Taıpeı, №21) syndy sańlaqtar saıysqa túsedi. Qatysýshylar qatarynda Kırıll Gerasımenko, Eskendir Harkı, Sarvınoz Mirqadyrova da bar.
- Osy kúnge deıin 20 kezdesý ótkizip, birde-bir ret jeńilip kórmegen tanymal kásipqoı boksshy Meıirim Nursultanov WBC nusqasy boıynsha orta salmaqtaǵy álem chempıony ataǵynan basty úmitker. Jankúıerler onyń altyn belbeýdi ıelenip otyrǵan Domınıkan Respýblıkasynyń dúldúli Karlos Adamespen (24-1-1, 18 KO) jekpe-jegin taǵatsyzdana kútip júr. Jeke jattyqtyrýshysy Djon Hatchınsonnyń aıtýynsha, Meıirim qazir babynda, chempıondyq tájdi ıelený úshin aıanyp qalmaıdy.
- Qyzdar arasynda shaıbaly hokkeıden ótip jatqan álem birinshiliginiń ekinshi dıvızıonyndaǵy tusaýkeser kezdesýinde elimizdiń quramasy Jańa Zelandııany 13:2 esebimen oısyrata utty. Bul kezdesýde Sofııa Mýravıova poker jasasa, Sofııa Zýbkova het-trık avtory atandy. Anfısa Novıkova eki gol soqsa, Vasılısa Shýklına, Anna Klımova, Renata Lıvshıs, Zlata Popova bir-bir retten mergendik tanytty.
