Eki dos

Olar Jańaarqa aýdany orta­lyǵyndaǵy Sáken Seıfýl­lın atyndaǵy orta mektepte bir synypta oqyǵan. Ekeýi de dombyra úıirmesine qatysady. 1965 jyly oqýdy birge bitirdi. Ekeýi de alǵashqylardyń biri bolyp qoldaryna gıtara ustady. Qorabaı gıtara tartýdy tez úırendi, qońyr daýsy aspap únine úılesip, tyńdaýshylaryn baýrap aldy. Jeti ishekten shyqqan jeti dybys bir arnaǵa toǵysyp, ádemi áýenmen úndestik tapqanda júrekti shymyrlatyp áketetin.

Qorabaı alǵash ret ınstıtýt sahnasynda «Jas qalam», «Qoshtasý» ánderin oryndady. Ustazdardyń, stýdentterdiń, qala halqynyń aldyna shyǵyp oryndaǵan osy eki áni tyńdaýshylardy jalt qaratty.

Dosynyń alǵashqy aıtqan áni, sahnaǵa shyqqan sáti Beıbittiń kóz aldynda. Sózi anyq, mýzykalyq yrǵaǵy jeńil sezildi. Ásirese stýdentter óleń shýmaqtaryn jyldam jattap alyp, ánge qosyldy.

«Kezdesseń urlana qaraımyn,

Asaýdaı týlaıdy jas júrek.

Men seni janyma balaımyn,

Sen úshin mende bar bir tilek»,

dep «Jas qalam» ánimen jastardyń júregine alaý jaqty. Endi birde:

«Súıe almadyq, kete almadyq, qımadyq,

Nege bizder bir qushaqqa sımadyq.

Ekeýmizde eki aıyrylǵan ózendeı,

Mahabatty basqa janǵa syıladyq»,

dep «Qoshtasý» ánin oryndap, tyńdar­manyn muńaıtyp qoıatyn edi. Alǵash oryndaǵan osy eki ánimen Qorabaı elimizge tanymal gıtarashy, ánshi atandy, eldiń qurmetine bólendi.

1970 jyly ekeýi de joǵary bilimdi maman bolyp shyqty.

Qorekeń qandaı qyzmet atqaryp júrse de gıtarasyn qolynan tastamady. Talǵampaz ánshi memleket jáne qoǵam qaıratkeri, aqyn Kákimbek Salyqovtyń sózine jazylǵan belgili kompozıtor Jaǵypar Álimhanovtyń «Saǵynysh», «Jyljıdy aqqý» atty ánderin qulpyrta shyrqap, jurt júregin jaýlady.

Qorabaı Ábikenulynyń Shet aýdanynda mal ósirýmen aınalysatyn qosalqy sharýashylyǵy boldy. Ol jyldary Beıbit Qasenov Karl Marks keńsharynyń (qazirgi Eralıev aýyldyq okrýgi) dırektory qyzmetin atqardy.

1986 jyly Qorabaı dosy «sharýa­shy­lyqty keńeıtemin, damytamyn, mal basyn kóbeıtemin. Maǵan keńshardyń aımaǵynan mal azyǵyn daıyndaıtyn jer bóldir, ózim shóp shaýyp tasyp alamyn. Ornyna keń­shar turǵyndaryna un, jem bosataıyn» degen usynys jasaıdy. Eki dos kelisip, sha­rýashylyq jumysyn shyr aınaldyrady.

Qazir Qorabaı Esenov Jańaarqa aýdan­dyq «Asyl qazyna» ansambliniń bedeldi múshesi. Jylda Qarttar kúnine oraı qarııalarǵa mádenı qurmet jasalady. Gıtaraǵa qosaqtaǵan qońyr daýsymen konserttiń kórkin kirgizedi.

Áýesqoı sazger Beıbit Baıbosynuly da kópshilik jınalǵan ortada óziniń shyǵarǵan ánin aıtyp, ystyq yqylasqa bólenip júr.

Eki dos ómir men óner aıdynynda qatar jyljyp keledi.

Ulytaý oblysy