Qazaqstannyń EAEO-daǵy basym baǵyttary týraly Memleket basshysy Qasym-Jomart Toqaev 2026 jyldyń qarsańynda odaqqa múshe memleketter basshylaryna joldaǵan úndeýinde málimdedi.
Negizgi basymdyqtardyń aldyńǵy qatarynda ekonomıkany sıfrlandyrý tur. Qazaqstan ózin sıfrly memleket retinde qalyptastyrýdy maqsat etip otyr jáne jasandy ıntellekt ekojúıelerin EAEO-ǵa múshe ózge elderde de damytýǵa atsalyspaq. Osyǵan baılanysty Memleket basshysy Reseı, Belarýs, Qyrǵyzstan jáne Armenııaǵa mamyr aıynda EAEO sheńberinde jasandy ıntellektini jaýapty damytý týraly birlesken málimdemege qol qoıýdy usyndy.
Taǵy bir mańyzdy baǵyt – kedergisiz saýda qaǵıdatyn iske asyrý. Qazaqstan tarapy júk kólikteriniń shekarada uzaq turyp qalýyn, artyq bıýrokratııalyq rásimderdi joıýdy kózdeıdi. Maqsat – kedendik jáne baqylaý sharalarynyń memleketter arasynda qysym quralyna aınalýyna jol bermeý. Bul úderisti baqylaý úshin de jasandy ıntellekt múmkindikterin paıdalaný usynylyp otyr.
Eýrazııalyq ekonomıkalyq odaq: Jańa mindetter men múmkindikter
Sonymen qatar Qazaqstannyń tóraǵalyǵy kezinde EAEO-nyń syrtqy álemmen ekonomıkalyq baılanysyn keńeıtýge erekshe nazar aýdarylady. Indonezııa, Mońǵolııa jáne Birikken Arab Ámirlikterimen erkin saýda jáne áriptestik týraly jańa kelisimderge qol qoıylýy osy baǵyttaǵy alǵashqy nátıjelerdiń biri sanalady. Aldaǵy ýaqytta Arab elderimen, Ońtústik-Shyǵys Azııa jáne Afrıka memleketterimen yntymaqtastyqty tereńdetý josparlanyp otyr.
Osylaısha, Qazaqstannyń EAEO-daǵy tóraǵalyǵy sıfrlandyrýǵa, erkin saýdaǵa jáne jahandyq ekonomıkalyq baılanystardy keńeıtýge negizdelgen jańa damý baǵytyn qalyptastyrýdy kózdeıdi.
