Adamı bolmysy taza, peıili keń osy azamatpen tanystyǵym budan shırek ǵasyrdaı buryn Astanada, Parlamentte qyzmettes bolǵan kezden bastalǵan edi. Aǵaly-inilik, áriptestik qarym-qatynasymyz da osy jyldar úlesinde.
Sol shaqta men Senattyń redaksııalyq-baspa bólimin basqarǵanmyn, al Musahan Aıtbaıuly osynda baspa sektorynyń meńgerýshisi edi. Qoldanysqa engiziletin zań mátinderin basyp shyǵarýdyń qıyn da kúrdeli jumysyn mindetine alǵan ol múltiksiz qyzmet isteı bildi. Buǵan qosa sol resmı mátinderdi qazaqshalaýdyń, redaksııalaýdyń tájirıbesin sheber meńgerdi. Parlament depýtattarynyń plenarlyq otyrystarynda ilespe aýdarma jasaýdyń da tetikterin ıgerip, bir sózben aıtqanda, joǵary zań shyǵarý mektebiniń bilikti mamany boldy. Áriptesteriniń senimi men qurmetine bólendi. Bul ekiniń biriniń qolynan kele bermeıtin, memlekettik deńgeıde sátti atqarylǵan qyzmet-tin. Bárimiz Musahannyń kásibı turǵydaǵy iskerligine kýá boldyq.
Syr boıynda qarapaıym temirjolshy otbasynda dúnıege kelip, ósip-ónip, aýyl mektebinen bilim alǵan boıshań qara domalaq bala ata-anasynyń taǵylymdy tárbıesinen baıandy bolashaǵyna nár aldy. Oblys ortalyǵyndaǵy pedınstıtýtty támamdap, ustazdyq qyzmetti týǵan aýyly Qarmaqshydaǵy mektepten bastaıdy.
Taǵdyr da – qatal synshy. Bul synaqtyń qıyn saǵattary da adam ómirin aınalyp óte almaıdy. Musahan otbasynyń berekesi, ul-qyzdarynyń anasy, júregi jaıdary, jany jaısań jary Qaldygúlden keshegi el basyna túsken indet kesirinen aıyrylyp qaldy. О́zine jubanyshty qosaǵy mápelegen balalarynan tapty, nemerelerine meıirlendi. Eńsesin túsirmedi, araǵa ýaqyt salyp altyn uıa úıiniń shańyraǵyna tileýles bolyp týǵan óńiriniń qyzy Manattaı janashyry keldi. Bári de ult dástúrine saı syılastyq negizinde órbidi. О́mirdiń taǵy da bir jarqyn sátteri týdy.
Musahan Aıtbaıulynyń bir ereksheligi – ol bilim salasyn búge-shigesine deıin biledi. Aýdanda, oblysta jaýapty qyzmetter atqarǵan. Eńbekpen jetile júrip, ekonomıkalyq ta, zańgerlik te joǵary bilim alǵan. Osynyń bári Parlamenttegi qyzmetine oń áser etti. Birtoǵa, tyndyrymdy, muqııat, eń bastysy – jaýapty ári bilikti. Senatta qanshama myqty, dúmdi qaıratkerler boldy. Solarmen kásibı deńgeıde til tabysty. Bilikti senatorlardyń jaqsy inisi, pikirlesi bola bildi. Jastarǵa óz deńgeıinde tálimger, ustaz atandy. Qyzmet pen otbasyn teń ustap, senim údesinen shyqty.
Eks-senator, ǵalym Baqbergen Dosmanbetov Musahannyń Qyzylorda oblysy men qalasyndaǵy eseli eńbegin aýzynan tastamaı aıtyp júretin. Mysaly, marqum Berdibek Saparbaev ákim bolyp turǵan kezde bilim júıesin jetildiretin birneshe jobasyn qoldaǵan kórinedi. Qaıratker marqum Nurlan Balǵynbaev Premer-mınıstr qyzmetinde júrip Qyzylordaǵa aıaldaǵanda osy jobalarǵa oń baǵa beripti. Árıne, mundaı jumys, bastama umytylmaıdy.
Aıtqandaıyn, jaýapty da tynymsyz qyzmetiniń arasynan ǵylymǵa ýaqyt taýyp, bilimdi uıymdastyrý máselesin taqyryp etip, saıası ǵylymdar kandıdaty dárejesin alǵany da bar. Kezinde jurtqa keńinen tanys «Qazaqstan mektebi» jýrnalyna qadaý-qadaý maqala jarııalaǵanyn áriptesteri jıi aıtyp otyrady. Munda mektep dırektorynyń, aýdandyq oqý bólimi meńgerýshisiniń, qalalyq bilim basqarma basshysynyń tájirıbesi tunyp tur. Senattyń jumysy aýyr. Munda shyǵarmashylyqqa kóp qol tıe bermese kerek.
Mereıli de mártebeli jasynyń merekeli mezetterin bastan keshirip jatqan Musahan Aıtbaıulyna aǵalyq kóńilden ómirdiń nurly kúnderin uzaǵynan kórýdi jazsyn degen tilek aıtamyn.
Mádı Aıymbetov,
Qazaqstannyń eńbek sińirgen qaıratkeri, jazýshy
