Sýret: baq.kz
Búginde ulttyq jobaǵa qatysýǵa kommýnaldyq kásiporyndar tarapynan joǵary qyzyǵýshylyq baıqalady. Osy kúnge deıin 101 kásiporyn 439 jobany júzege asyrýǵa ótinim berse, 34 joba júzege asyrylyp jatyr, taǵy 65 joba bastalmaq. Vıse-premer sáýir-mamyr aılarynda jóndeý jumystarynyń belsendi kezeńine ótýine baılanysty tehnıkalyq operatormen birlesip, Ulttyq jobanyń jospar-kestesiniń oryndalýyna monıtorıng júrgizip, baqylaýdy kúsheıtýdi tapsyrdy.
«Jospar-kestede jelilerdiń parametrlerin, ár óńirde ınfraqurylym baǵytymen qarjylandyrý mólsheri, naqty mindetter men kórsetkishter jazylǵan. Bıyl biz jylýmen jabdyqtaýda tozý deńgeıin 48%-ǵa deıin, elektrmen jabdyqtaýda 62%-ǵa deıin, sýmen jabdyqtaýda 37%-ǵa deıin, sý burýda 49%-ǵa deıin tómendetýge qol jetkizýimiz kerek. Sondaı-aq jańa energetıkalyq qýattardy iske qosý da mańyzdy. Sondyqtan jospar-kesteni qatań saqtaýǵa tıispiz», dedi Qanat Bozymbaev.
О́ńir ákimdikterine «qyzyl aımaqta» turǵan kásiporyndarmen jumysty jedeldetýdi tapsyrdy. Qazir ulttyq jobaǵa shamamen 54 osyndaı sýbekt kiredi.
Otyrys barysynda kárizdik-tazartý qurylystaryn (KTQ) jańǵyrtýǵa erekshe nazar aýdaryldy. Ulttyq joba aıasynda 36 KTQ qamtylǵan. Olardy qarjylandyrý tetikteri talqylandy. Jergilikti atqarýshy organdardyń memlekettik baǵaly qaǵazdary esebinen de, halyqaralyq qarjy ınstıtýttarynyń qarajatyn tartý arqyly da túıtkildi sheshý mańyzdy. KTQ jobalaryn júzege asyrý úshin, onyń ishinde Dúnıejúzilik bankpen jumys baǵyttaryn qamtıtyn Jol kartasy bekitiledi. Ákimdikterge, tehnıkalyq jáne qarjylyq operatorlarǵa tıisti tapsyrmalar berildi.
Qanat Bozymbaev Energetıkalyq jáne kommýnaldyq sektorlardy jańǵyrtý jónindegi ulttyq joba sheńberinde júzege asyrylatyn barlyq sharýany ýaqtyly qarjylandyrýdy qamtamasyz etýdiń mańyzdylyǵyn atap ótti. «Báıterek» ulttyq ınvestısııalyq holdınginiń dereginshe jalpy quny 148 mlrd teńge bolatyn 76 joba qaraldy.
Ulttyq joba aıasyndaǵy negizgi kredıtorlardyń biri – Qazaqstannyń Damý banki. Banktik saraptamanyń ártúrli kezeńderinde 14 kommýnaldyq kásiporynnyń jalpy jobalyq quny shamamen 375 mlrd teńgeni quraıtyn kredıttik ótinimderi qaralýda. Qarjylandyrýdyń taǵy bir kózi – memlekettik baǵaly qaǵazdar. Byltyr 15 jobany júzege asyrý úshin 29,3 mlrd teńgege jergilikti atqarýshy organdardyń memlekettik baǵaly qaǵazdary satyp alyndy. Bıyl osy jobalardy aıaqtaýǵa qosymsha 26 mlrd teńge baǵyttaý josparlanyp otyr.
Ulttyq jobany úzdiksiz júzege asyrýdy qamtamasyz etý maqsatynda vıse-premer satyp alýlar boıynsha elektrondyq platformany jetildirýdi tapsyrdy. Sondaı-aq salalyq vedomstvolarǵa esepke alý qurylǵylaryna qatysty biryńǵaı standarttardy qabyldaýdy jedeldetýdi júktedi. Sonymen qatar bıyl jazda iske qosylady dep josparlanǵan «Smart Turmys» aqparattyq júıesin ýaqytynda engizýdi tapsyrdy.
