Qaraǵaı tuqymyn alý munymen bitpeıdi. Qanatshalar odan ári tazartylyp, ishinen dánderin bólip alady. «Jınalǵan tuqym orman sharýashylyǵy mekemesiniń tálimbaǵynda sebiledi. Qylqan japyraqtylar óte baıaý ósedi. Bir dánniń kóktep, kóshetke aınalýy úshin keminde tórt jyl kerek. Osy ýaqyt ishinde jas óskindi basqa jerge kóshirýge bolmaıdy. Boıy ósip, tamyry bekigen soń tórt jyldan keıin tálimbaqtyń kóshetter bólimine aýystyramyz. Ormanshylarymyz qaraǵaı búrshigin jınaýdy jeltoqsannyń sońynan bastaıdy. Barqyn qumdarynda 19 myń gektar alqapta ósip turǵan qylqan japyraqty aǵashtar toǵaıy HIH ǵasyrdyń sońynda Oıyl orman bekinisi salynǵanda otyrǵyzylǵan. Eki ǵasyrǵa jýyq osy aǵashtar tamyr jaıdy, shekarasyn keńeıtti. Qum astyndaǵy tushy sý qory da betindegi ósimdikterdiń kóbeıýine áser etip tur. 90-jyldardyń toqyraýynda tabıǵat qorǵaý mekemesi tozyp ketkenimen, keıingi jyldary osy salada jaqsy betburys bolyp jatyr. Bizdiń mekeme mamandary da orman ekpelerin aǵash tuqymdarynan kóbeıtedi», deıdi Oıyl orman jáne janýarlar dúnıesin qorǵaý mekemesiniń basshysy Serik Mýsın.
Qys ortasynda tuqym shashatyn qylqan japyraqtynyń qanatshalaryn jınaý ońaı emes. Oıyl ormanshylary eki aıda 800–1000 kılo búrshik jınap, tazarta kele alynatyn taza dánniń salmaǵy 8-10 kılogramnan aspaıdy eken. Jumys túgeldeı qolmen atqarylady. Barqyn qumdarynda qylqan japyraqtylardyń tuqymdaryn jınaý jumysy osylaısha qyzyp tur.
Aqtóbe oblysy,
Oıyl aýdany
