Úshemderin úlbiretip qushaǵyna alǵan Symbatty perzenthana aldynda oblys ákiminiń orynbasary Gúlbaram Musaǵazına, erli-zaıypty Dáýren men Symbattyń aǵaıyn-týys, jora-joldastary, jýrnalıster kútip aldy. Ákim orynbasary úshemderdiń anasyna kórimdik dep 1 mln teńgeniń sertıfıkatyn berdi.
Dárigerlerdiń aıtýynsha, Qostanaı perzenthanasynda keıingi on jyldyń kóleminde osymen 14 úshem dúnıege kelip otyr. Úsh náresteniń ekeýiniń salmaǵy – 2600, bireýiniki – 2300 gramm.
«Úsh ulymyz bar, úlkeni – 10, ortanshymyz – 8, odan kishisi – 4 jasta. Endi bir qyz berse ǵoı dep armandaıtynbyz. Dárigerden úshemge júkti ekenimdi estigende qaıran qalǵanym sonsha, ne isterimdi bilmedim. 23 kún aýrýhanada jattym. Dárigerlerdiń arqasynda janymyz qalyp, úshem súıdik. Baqyt degen osy shyǵar», deıdi kópbalaly ana Symbat Sharapıeva.
Kópshilik nárestelerdiń ata-anasyn jan-jaqtan qaýmalap jarysa quttyqtasyp, gúl usynyp jatqanda, úshemderdiń ájesi Ǵalııa Sharapıeva jalǵyz ózi shetteý jerde oıǵa batyp turdy. Ájeıdi áńgimege tartyp, «Kelinińiz úsh birdeı náreseteni ómirge ákelip jatyr. Mundaıda qýanbaısyz ba?» dedik.
«Qýanamyn ǵoı, qýanbaǵanda she, qudaıdyń bergenine shúkir deımin! Balalarym osy qaladan 25 shaqyrym jerde bir bólmeli tar úıde qysylyp-qymtyrylyp turyp jatyr. Aýylda gaz-sý bar, biraq bularda joq. О́sip kele jatqan úsh balasy bar edi, taǵy úsh qyzymyz ómirge keldi. Endi osy nárestelerdi qaıda alyp bararymdy oılap, muńaıyńqyrap turmyn. О́zimniń de úıim tar. Kelinim birtalaı jyldan beri baladan uzap shyǵa almaı, úıde otyr. Ulym Qostanaıǵa kelip-ketip jumys istep júr. Tańerteń ketkennen keshke bir-aq keledi. Osyndaǵy dıirmenniń birinde un tıeıdi. Endi qalaı bolatynyn bilmeımin», dedi úshemniń ájesi.
Júregin birde qýanysh kernep, birde muń torlaǵan zeınetkerdi «Bir reti bolar, qamyqpańyz», dep jubatqan boldyq.
Osydan birneshe jyl buryn Meńdiqara aýdanyndaǵy Harkov aýylynda ómirge kelgen Nıkolaı, Evgenıı, Vıoletta esimdi úshemderdiń anasyna jergilikti agrofırmanyń basshysy Erkin Buqanov eńsesi bıik, keń baspana tartý etip, úshemniń anasy aı saıyn alyp turatyn 100 myń teńge kólemindegi qarjylaı kómek taǵaıyndaǵan edi. Odan keıin, 2024 jyly Qostanaıda Aıarý, Ardan, Arlan esimdi úshemder dúnıege keldi. Ol kezde de qala ákimi Marat Júndibaevtyń ózi qalbalaqtap júgirip kelip, kópbalaly ananyń qolyna ishinde úsh bólmeli páter kilti bar qyzyl barqyt qorapshany ustatyp ketkeni esimizde.
«Bir qozy týsa, bir túp jýsan artyq shyǵady», ár balanyń óz nesibesi bar, bálkim, úsh uldan keıin úshem dúnıege kelgen Sharapıevter otbasyna da qolushyn sozyp, sharapatyn tıgizetin janashyr azamattar tabylyp
qalar.
Qostanaı oblysy
