ASTANA. 25 aqpan. «Barys» Qurlyqtyq hokkeı lıgasynyń turaqty chempıonatynda Nıjnıı Novgorodtyń «Torpedosynan» 4:2 esebimen basym tústi. Bul týraly egemen.kz tilshisi habarlady.
Astanadaǵy «Qazaqstan» sport saraıynda ótken oıyn aıdyn ıeleriniń basymdyǵymen bastaldy. Nebári 3-mınýtta qonaqtar sapynan Vıktor Drýgov kishi aıyppen jazalanyp, «Barys» oıynshy basymdyǵyna ıe boldy. О́zderine berilgen múmkindikti múlt jibermegen astanalyqtar 3-mınýtta esep ashty. Goldyń avtory – Naıdjel Doýs. Artynsha «Torpedo» oıynshylary da eki márte oıynshy basymdyǵyna ıe bolǵanymen, esepti teńestirýge shamalary jetpedi. Al tartystyń 13-mınýtynda qos birdeı qorǵaýshyny qapy qaldyryp, qaqpashymen betpe-bet shyqqan Talǵat Jaılaýov komandasynyń ekinshi shaıbasyn soqty. Bul joly nátıjeli shabýyldy uıymdastyrǵan «Barys» qaqpashysy Iаn Laso men shabýylshy Dastın Boıd ekenin aıta keteıik.
Ekinshi kezeńde aıdyn ıeleri negizinen qorǵanysqa kóńil bólip, kóbine qarymta shabýylǵa ıek arta oınady. Qarsylastarynyń qarqyny báseńdegenin baıqaǵan reseılikter shabýyldaryn kúsheıtti. Nátıjesinde, 38-mınýtta Nıkıta Dvýrechenskıı mergendigimen kózge túsip, esep aıyrmasyn qysqartty.
Sheshýshi kezeńniń basynda Dvýrechenskıı dýbldiń avtory atanyp, esepti teńestirdi. Desek te, astanalyq komanda oıyn sońyna deıin eki shaıba soǵyp, turaqty chempıonattyń sońǵy oıynyn jeńispen aıaqtady. Atalǵan eki nátıjeli soqqyny Nıkolaı Antropov pen Konstantın Pýshkarev jasaǵanyn aıta keteıik.
Osymen QHL-dyń turaqty chempıonaty 2014-2015 jylǵy maýsymnyń shymyldyǵyn túsirdi. Endi alda pleı-off kezeńi. 28 komandanyń ishinen úzdik shyqqan 16 ujym «Gagarın kýbogyn» sarapqa salady. Bul kezeńniń alǵashqy satysynda «Barys» ombylyq «Avangardpen» oınaıdy. Qos komanda aldymen 28 aqpan jáne 1 naýryz kúnderi Ombyda sheberlik baıqasady. Al 3-4 naýryz kúnderi «Barys» «Avangardty» óz aıdynynda qabyldaıdy.
Elaman Qońyr.
Derek: egemen.kz.
Sýret: hcbarys.kz.
1
