Sýret: eldala.kz
Burynǵy Semeı ıadrolyq synaq polıgonynyń 434 myń gektar jerin Maı aýdanynyń zapastaǵy jer qorynyń sanatyna aýystyrý uıǵaryldy.
– Bıyl Kýrchatov qalasynyń 11 myń gektar aýmaǵyn Abaı oblysyna berýge baılanysty oblys pen eldi mekender shekaralaryn retteý, sondaı-aq Pavlodar oblysynyń Baıanaýyl aýdany men Qaraǵandy oblysynyń Osakarov aýdany arasyndaǵy kópjyldyq jer daýyn túpkilikti sheshý jumysy aıaqtalýǵa tıis. Sondaı-aq burynǵy Semeı ıadrolyq synaq polıgonynyń 434 myń gektar jerin Maı aýdanynyń zapastaǵy jer qorynyń sanatyna aýystyrý josparlanǵan, – dep habarlady oblystyq ákimdikten.
О́ńirde jaıylymdyq jerler tapshylyǵy asa ózekti. 80 aýylda jeke qosalqy sharýashylyq boıynsha jaıylym tapshylyǵy – 109,9 myń gektar. Halyqtyń qajettiligi úshin qazirdiń ózinde 10,9 myń gektar jer qaıta bólindi. Jaıylym tapshylyǵyn joıý boıynsha Jol kartasy ázirlenýde, sondaı-aq jerdiń tozýy men shóleıttenýine qarsy is-sharalar, onyń ishinde ónimdiligi tómen ýchaskelerdi shalǵyndandyrý men búlingen aýmaqtardy rekýltıvasııalaý baǵdarlamasy júzege asyrylyp jatyr.
Resmı málimetterge súıensek, Aqtoǵaı, Baıanaýyl aýdandary men Ekibastuz qalasynyń aýyldyq aımaǵynda mal sharýashylyǵynyń belsendi damýyna baılanysty egistik jerler jaıylymǵa aýystyrylyp jatyr. Al Pavlodar, Ertis aýdandarynda, Aqsý qalasynyń aýyldyq aımaǵynda, sondaı-aq Tereńkól men Aqqýly aýdandarynda kerisinshe, ósimdik sharýashylyǵynyń kólemin arttyrý úshin jaıylymdyq jerler egistikke qaıta baǵyttalady. Bul rette sýarmaly eginshilikti damytý Memleket basshysy tarapynan agrarlyq saıasattyń strategııalyq basymdyǵy retinde aıqyndalǵanyn eskergen abzal. 2025 jyly sýarmaly alqaptardyń kólemi 11,6 myń gektarǵa ulǵaıyp, 191,2 myń gektarǵa jetken. Jer paıdalanýshylar qarajaty esebinen 3,5 myń gektar aýmaqta ınjenerlik-kommýnıkasııalyq ınfraqurylym tartý boıynsha 10 joba iske asyrylyp, sýarmaly alqaptardyń naqty kólemi 85 myń gektarǵa jetkizildi. Bıyl jalpy aýmaǵy 2 myń gektarǵa jýyq bes sýarmaly egis alqabyn iske qosý josparlanǵan.
Qýantarlyǵy, 2025 jyldyń qorytyndysy boıynsha jerdi aýyl sharýashylyǵy aınalymyna tartý jospary 196,1 myń gektar kóleminde oryndalyp, kózdelgen mejeden asyp túsken. Al 2026 jylǵy jospar 238 myń gektar kóleminde belgilenip qoıypty. Aýyl sharýashylyǵy jerlerin qospaǵanda, oblystyń úsh qalasynyń eldi mekenderindegi jer ýchaskeleri jyljymaıtyn múliktiń biryńǵaı memlekettik kadastry arqyly onlaın-formatta usynylady. Qańtar aıynan bastap jalǵa alý merzimin uzartý, nysanaly maqsatyn ózgertý jáne jer ýchaskelerin jekemenshikke satý memlekettik qyzmetteri iske qosylǵan.
Pavlodar oblysy
