Sýret: polese.by
Senat depýtaty Evgenıı Bolgert Qazaqstannyń nemis jastary odaǵynyń aktıvimen kezdesip, jastarmen ashyq áńgime órbitti. Jańa Konstıtýsııa jobasynyń erejeleri, parlamenttik reformanyń negizgi baǵyttary, onyń ishinde Parlamenttiń bir palataly úlgisine kóshý taqyrybyna toqtaldy. Senator qatysýshylarǵa bılik tarmaqtary arasynda ókilettikterdi qaıta bólý, Parlamenttiń memlekettik basqarý júıesindegi rólin kúsheıtý, parlamenttik baqylaý tetikterin damytý, sondaı-aq zań shyǵarý úderisinde óńirlerdiń ókildigin keńeıtý týraly jan-jaqty aıtyp berdi.
Senator Sáken Arýbaev Jambyl oblysy Qarataý qalasynyń turǵyndarymen, «Talas Investment Company», «Sholaqtaý» taý-ken baıytý kesheni, «Qazfosfat» JShS ujymdarymen, sondaı-aq №3 Arnaýly áleýmettik qyzmetter ortalyǵynyń qyzmetkerlerimen kezdesti. S.Arýbaev usynylǵan ózgerister adam quqyqtary men bostandyqtarynyń kepildigin nyǵaıtýǵa, memlekettik ınstıtýttardyń jaýapkershiligin arttyrýǵa, ádildik pen progress qaǵıdattaryna negizdelgen jańa qoǵamdyq shartty qalyptastyrýǵa baǵyttalǵanyn aıtty.
Depýtat Rýslan Rústemov Qyzylorda oblysynda Isataı Ábdikárimov atyndaǵy joǵary polıtehnıkalyq kolledj ujymymen júzdesti. Ol qatysýshylarǵa konstıtýsııalyq ózgeristerdiń logıkasy, qujatty daıyndaý kezeńderi jáne ony ázirleý kezinde eskerilgen qoǵamdyq usynystardyń rólin jan-jaqty túsindirdi.
Al Senat depýtaty, Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy, Konstıtýsııalyq komıssııanyń jáne jalpyulttyq koalısııanyń múshesi Nurlan Beknazarov Jambyl, Túrkistan oblystarynda, sondaı-aq Shymkent qalasynda boldy. Ol jumys sapary barysynda turǵyndarmen, ǵylymı jáne mádenı qoǵamdastyq ókilderimen, eńbek ujymdarymen, stýdent jastarmen kezdesýler ótkizdi.
«Jańa Negizgi zańda jalpyulttyq baǵdarlar men urpaqtar sabaqtastyǵyn kórsetetin jańa kirispeden bastap sóz bostandyǵyn, ǵylymı, tehnıkalyq jáne shyǵarmashylyq qyzmetti qamtamasyz etýge, zııatkerlik menshikti qorǵaýǵa, otbasy jáne neke ınstıtýtyn nyǵaıtýǵa baǵyttalǵan normalarǵa deıingi zamanaýı jáne irgeli qundylyqtar birden bekitiledi», dedi N.Beknazarov.
Depýtat Aıgúl Qapbarova da Halyq Konstıtýsııasynyń jobasyn Shymkent turǵyndarymen birge talqylady. Ol Turan aýdanynda Qazaqstan halqy Assambleıasynyń ókilderimen, Aqjar shaǵyn aýdanynyń turǵyndarymen, №1 Shymkent qalalyq aýrýhana ujymymen jáne «Atameken» ulttyq kásipkerler palatasy kásipkerlerimen kezdesti. Senator qoǵamdyq kelisimdi konstıtýsııalyq bekitý, etnosaralyq turaqtylyqty saqtaý jáne ulttyq birlikti nyǵaıtý máselelerin erekshe atap ótti.
О́ńirlerdegi mundaı kezdesýler konstıtýsııalyq qaıta qurýdyń mánin tereńirek túsinýge yqpal etip, jańa Konstıtýsııa jobasyn búkilhalyqtyq talqylaý kezeńinde qoǵam men bılik ókilderi arasyndaǵy ózara is-qımyldy nyǵaıtady.
