Prezıdent aldymen «U.S. International Development Finance» korporasııasynyń (DFC) atqarýshy dırektory Ben Blekti qabyldady.
Bedeldi halyqaralyq qarjy ınstıtýty basshysymen kezdesýde ınvestısııalyq yntymaqtastyqty keńeıtý jáne birlesken jobalardy júzege asyrý keleshegi talqylandy.
Memleket basshysy korporasııany Qazaqstannyń ornyqty damýdaǵy mańyzdy seriktesi dep atap, ekonomıkanyń túrli sektoryndaǵy yqpaldastyqty tereńdetýge ázir ekenin rastady.
Ben Blek Prezıdent Donald Tramp pen onyń ákimshiligi Qazaqstanmen tyǵyz ári ózara tıimdi yntymaqtastyqty nyǵaıtýǵa basa mán beretinin aıtty. Osy oraıda ol aımaqtyq jáne óńiraralyq saýdany keńeıtýde strategııalyq mańyzǵa ıe taý-ken óndirisi, kólik-tranzıt ınfraqurylymy salalarynda birlesken jobalardy júzege asyrýdyń múmkindigi mol ekenine nazar aýdardy.
* * *
Odan soń Memleket basshysy Qasym-Jomart Toqaev Boeing kompanııasynyń atqarýshy vıse-prezıdenti Djeff Shokkıdi qabyldady.
Avıasııa, qorǵanys jáne ǵarysh tehnıkalaryn shyǵaratyn «Boeing» transulttyq korporasııasynyń basshylyǵymen kezdesýde Prezıdent otandyq «Air Astana», «SSAT» jáne «Vietjet Qazaqstan» kompanııalary elimizdegi avıasııa salasyn damytýda erekshe mańyzǵa ıe ortaq jobalardy odan ári ilgeriletýge múddeli ekenin atap ótti.
Bul rette Qasym-Jomart Toqaev «Air Astana» men «Boeing» arasynda ushaq jetkizý boıynsha kelisimge qol qoıylǵanyn quptady. Bıyl jyl sońyna deıin Qurama Shtattarǵa tikeleı áýe qatynasyn ashý maqsatynda «Boeing 787 Dreamliner» ushaqtary elimizge jetkiziledi dep josparlanyp otyr. Budan bólek, «SCAT» áýe kompanııasy qosymsha «Boeing» ushaqtaryn satyp almaq. Sondaı-aq amerıkalyq korporasııamen seriktestik negizinde Shymkent áýejaıynda alǵashqy tehnıkalyq qyzmet kórsetý jáne jóndeý ortalyǵyn ashý múmkindigi qarastyrylyp jatyr.
Djeff Shokkı kompanııanyń sıfrlandyrý salasyndaǵy josparymen bólisip, Qazaqstannyń kólik-tranzıt áleýetine joǵary baǵa berdi. Onyń aıtýynsha, áýemen júk tasymaldaý baǵytynda nátıjeli yqpaldastyq ornatýǵa múmkindik mol.
Sonymen qatar kezdesý barysynda avıasııa salasyna maman daıarlaý jáne elimizdegi júk tasymaldaýshy ushaqtar parkin damytý keleshegi talqylandy.
* * *
Prezıdent Ashmore Group halyqaralyq ınvestısııalyq kompanııasynyń bas dırektory Mark Kýmbsty qabyldady. Olar ózara tıimdi birlesken jobalardy iske asyrý máselelerin talqylady.
Prezıdent Qasym-Jomart Toqaevqa «Ashmore Healthcare International» kompanııasy men «Samuryq-Qazyna Invest» JShS-nyń birlesip, Qazaqstanda halyqaralyq klınıka salý jospary jóninde málimet berildi. Bul bastamaǵa álemdik deńgeıdegi medısına operatory – «Mount Sinai Health System» kompanııasyn tartý kózdelgen.
Memleket basshysy Úkimettiń atalǵan mańyzdy jobaǵa jan-jaqty qoldaý kórsetýge daıyn ekenin aıtty.
Mark Kýmbs Qazaqstan ekonomıkasynyń strategııalyq sektorlarynda yntymaqtastyq ornatý úshin zor áleýet bar ekenine nazar aýdardy. Sonymen qatar ekonomıkanyń basymdyqqa ıe jáne joǵary tehnologııaly salalaryn damytýǵa baǵyttalǵan Ashyq ınvestısııalyq seriktestik baǵdarlamasy aıasyndaǵy yqpaldastyq keleshegi jaıynda pikir bólisti.
* * *
Qasym-Jomart Toqaev «Mars» kompanııasynyń bas atqarýshy dırektory Pol Vaıraýhty qabyldady.
Prezıdent Qazaqstannyń Aýyl sharýashylyǵy mınıstrligi men «Mars» kompanııasy arasynda jalpy somasy 180 mln dollarǵa jýyqtaıtyn ınvestısııalyq kelisimge qol qoıylǵanyn quptady.
Memleket basshysynyń pikirinshe, bul ýaǵdalastyq mańyzdy strategııalyq seriktestiktiń bastaýy sanalady jáne Qazaqstan men AQSh arasyndaǵy yntymaqtastyqtyń deńgeıi joǵary ekenin kórsetedi.
Joba aıasynda «Mars» kompanııasy Alataý qalasynda úı janýarlaryna arnalǵan azyq óndiretin zaýyt salady. О́ndiris orny agroónerkásip shıkizatyn tereń óńdeýge jáne qosylǵan quny joǵary taýar óndirýge septigin tıgizedi.
Pol Vaıraýh ózara tıimdi ınvestısııalyq kelisimdi júzege asyrýǵa qoldaý kórsetkeni úshin Qasym-Jomart Toqaevqa alǵys aıtty. Ol atalǵan bastama «Mars» kompanııasynyń óndiristik áleýetin keńeıtýge jáne Ortalyq Azııa men kórshiles aımaqtar naryǵyna ónim shyǵarý kólemin arttyrýǵa múmkindik beretinin jetkizdi.
