ASTANA. 26 naýryz. AQSh-tyń Washington Post, Irish Central jáne The Lancet basylymdary jarııalaǵan derekter boıynsha Tájikstan alkogoldi ishimdikti tutynýdan álemde alǵashqy orynda tur. Tizimdi jasaý barysynda Dúnıejúzilik densaýlyq saqtaý uıymynyń kórsetkishteri negizge alynǵan. Bul týraly news-asia.ru habarlady.
Keltirilgen málimetke súıensek, 15 jastan asqan árbir tájikstandyqqa jylyna orta eseppen 30,3 lıtr ishimdikten keledi eken. Sonyń ishinde ishimdik ishetin bir er adamǵa 31,1 lıtrden kelse, alkogolden bas tartpaıtyn ár tájik áıeli jylyna 28,3 lıtr araq-sharap tutynady. Bul kórsetkish boıynsha ishimdik ishýden aldyna jan salmaıtyn Reseıdiń ózi tájikterge jol berip tur. Árbir reseılik orta eseppen jylyna 22 lıtr alkogol ónimderin tutynady. Degenmen, ishimdik ishetin ár er adamnyń kórsetkishi boıynsha soltústik kórshimiz alda keledi (32 lıtr). Al Reseı áıelderi 12,6 lıtr ishimdik ishedi eken.
The Lancet medısınalyq jýrnalynyń zertteýi boıynsha sońǵy kezderi Eýropa pen Amerıkada ishimdik ishý kórsetkishi tómendegen. Kerisinshe, Azııa halyqtary arasynda bul úrdis keń etek jaıýda. Máselen, bizdiń elde jan basyna shaqqandaǵy bir jyldyq kórsetkish 26,2 lıtrge teń. О́zbekstanda 12,3 lıtrdi qurasa, ár qyrǵyzǵa jylyna 11,3 lıtr alkogol tıedi.
Bir qyzyǵy, 2008-2010 jyldary júrgizilgen zertteý jumystarynyń nátıjesinde, Tájikstanda ár adamǵa bir jylda 2,8 lıtr spırttik ónimnen kelgen. Tipti Dúnıejúzilik densaýlyq saqtaý uıymynyń deregi boıynsha bes jyl buryn tek árbir 11-shi tájikstandyq qana ishimdik ishetin. Ol az deseńiz, sol kezde erlerdiń 86,1 paıyzy, al áıelderdiń 95,2 paıyzy múldem ashy sýdy tatyp kórmegenin aıtqan. Osynsha az ýaqyttyń ishinde jaǵdaıdyń kúrt nasharlap ketýiniń sebebin mamandar anyqtaı almaýda. Onyń ústine, búginde tájikterdiń 89 paıyzy kúshi joǵary ishimdikti qalaıdy eken. Tek 10 paıyzy ǵana syra ónimderin tutynsa, 1 paıyzy sharappen shektelýdi jón sanaıdy.
Batys elderindegi zertteýshilerdi sary qurlyqtaǵy bul jaǵdaı qatty alańdatyp tyr. Sebebi, Azııa halyq eń kóp shoǵyrlanǵan qurlyq. Al ishimdikti tutyný dál osy baǵytta jalǵasa berse, adamdardyń qalyń oshaǵy san túrli aýrýdyń ózegine aınalýy ábden múmkin. Qazirdiń ózinde Qytaıda 300 myń adam alkogol ónimderinen qaıtys bolady.
Elaman Qońyr.
Derek: news-asia.ru.
Sýret: maiden.com.ua.
