Bul kitaphananyń Batys Qazaqstan ınnovasııalyq-tehnologııalyq ýnıversıtetine qarasty Salalyq tehnologııalar ınstıtýtymen birge júzege asyrǵan jańa jobasy bolatyn. Osy ınstıtýttyń sáýlet mamandyǵynda oqyp júrgen 5-kýrs stýdentteri Tatıana Dýdykına men Dıas Taıshýrın Oral qalasyndaǵy Batys Qazaqstan oblystyq tarıhı-ólketaný mýzeıi men Qadyr Myrza Áli atyndaǵy oblystyq mádenıet jáne óner ortalyǵy ǵımaratynyń shaǵyn maketin jasaǵan. Al kitaphana qyzmetkerleri bolsa osy tarıhı ǵımarattar jaıly tolyq aqparatty braıl qarpinde daıarlap, atalǵan nysandardyń bederli-grafıkalyq sýretteri bar kitapsha ázirlegen.
Is-shara óte qyzyqty ótti. Oǵan ýnıversıtet rektory Bekbolat Shákeshev, ınstıtýt dırektory, tehnıka ǵylymdarynyń kandıdaty Baýyrjan Bılashev, sáýlet jáne qurylys kafedrasynyń meńgerýshisi Nurlan Bekqalıev, Qazaqstannyń qurmetti sáýletshisi, sáýlet jáne qurylys kafedrasynyń aǵa oqytýshysy, maketterdi daıyndaýda jetekshilik etken maman Maıra Sársenǵalıeva men maket avtorlary arnaıy kelipti. Al ǵımaratpen tanysýǵa kelgen oblystyq kórý qabileti buzylǵan balalarǵa arnalǵan arnaýly mektep-ınternaty tárbıelenýshileriniń, arnaýly kitaphana oqyrmandarynyń alǵan áserinde shek joq.
– Maketke qolym tıgennen-aq bul ǵımarattyń bizdiń ólketaný mýzeıimiz ekenin birden bildim. О́ıtkeni buryn kórdim ǵoı, osyndaı kishkene munaralary bolǵany esimde qalypty. Oqýshy kezimizde mýzeıge keletinbiz, balalyq shaqtyń estelikteri jadymda jańǵyryp, qýanyp qaldym. Ádemi maketti jasaǵan stýdentterge myń alǵys, óneri ústeı bersin! Buǵan qosa bizdiń kitaphananyń qyzdary maǵlumaty mol kitapsha daıyndapty. Mundaǵy QR kod arqyly búkil aqparatty daýsymen tyńdaýǵa da bolady. Bizge ǵajaıyp áser syılaǵan ujymǵa rahmet aıtamyz! – deıdi kitaphana oqyrmany, Oral qalalyq №2 emhananyń logoped-defektologi Bıbigúl Moldasheva.
Zeınetker Tatıana Gorshkova da jasyraq kezinde mýzeı ǵımaratyn emis-emis kórgenin aıtady. Biraq onyń sán-sáýletin dál osylaı anyq, naqty sezinbegen eken.
– Qadyr saraıda ózim birneshe jyl qyzmet ettim, sahnasynda talaı án saldym. Biraq onyń ǵımaraty osyndaı jarty sheńber ekenin bilmeppin, – dep tań-tamasha qaldy Qazaqstannyń eńbek sińirgen qaıratkeri, belgili ánshi Hatımolla Berdiǵalıev aǵamyz.
Is-shara sońynda kitaphana dırektory Marfýǵa Aıtqalıeva «Taktıldi Oral» jobasyn atqarýǵa kómektesken ýnıversıtet ujymyna, maketterdi daıyndaýǵa qol ushyn bergen jetekshi maman men stýdentterge oqyrmandar atynan rızashylyq bildirip, alǵys hat tabystady.
Batys Qazaqstan oblysy
