Poemanyń basty keıipkeri – qazaqtyń ǵana emes, túgel túrkiniń alapat rýhty aqyny Maǵjan Jumabaev. Bireý biler, bireý bilmes, el aýzynda bul án Maǵjan esimimen baılanystyrylady. О́zge tilderde jaryq kórgen jınaq ánshiniń sheteldegi jankúıerleriniń zor qyzyǵýshylyǵyn týdyrady. Sóıte-sóıte atalǵan kitap meksıkalyq aqyn Magda Evengalıstanyń kózine tússe kerek. Ol muhıttyń arǵy jaǵynan avtormen baılanysqa shyǵyp, shyǵarmany óz yqtııarymen ıspan tiline qotarypty.
«Daıdıdaýdy» ıspansha sóıletkenshe «Dımashqa hattar» (Letters to Dimash) atty jyr jınaǵyn jazǵan Magda Evengalısta:
– Dımash shabyt syılap qana qoıǵan joq, ol maǵan álemniń túkpir-túkpirinen tamasha adamdardy jolyqtyrýǵa kómektesti. Solardyń biri – aqyn Abylaı Maýdan. Biz onymen pikir almasyp, alys qashyqtyqqa qaramastan, dos bolyp kettik. Hat almastyq. «Daıdıdaý» kitaby týraly alǵash áleýmettik jeliden bildim. Ol buǵan deıin tórt tilde jaryq kóripti. Men ony poshta arqyly aldyrtyp, ıspan tiline aýdardym. Taıaýda ádebı basylymdardyń birine usyný josparymda bar. Bizdiń elde onyń oqyrmandary kóp bolaryna kúmánim joq. Jankúıerleri Dımashqa qatysy bar ár dúnıeni qurmetteıdi. Bul – óte kreatıv ıdeıa! Dımash arqyly álemge qazaq ádebıetin tanytýǵa berilgen zor múmkindik. Sizderdiń jerlesterińizdiń poemasy arqyly men qazaq ádebıetiniń dámin tattym, erekshe unady, áserli týyndy. Osyndaı tamasha poemany ıspan tiline aýdarýǵa ruqsat bergeni úshin Abylaı dosyma alǵysym sheksiz – depti.
Meksıkalyq avtor Abylaı Maýdannyń týyndysy aldynan taǵy bir álem ashqanyn aıtypty. Ol – aqyn Maǵjan Jumabaev. Buryn mundaı esimdi bilmeıtin ol ınternetten óleńderin izdep taýyp, aýdaryp oqıdy. «Maǵjan – óte rýhty, qýatty aqyn eken. Qyzyǵy, «Dears» (Dımashtyń jankúıerleri) arasynda «Daıdıdaýdyń» avtory ıdeologııalyq sebeptermen 24 mamyrda ólim jazasyna kesilgen, al araǵa jyldar salyp, dál osy kúni Dımash dúnıege kelgen» degen ańyz bar. Bul jaı qaýeset bolsa da, Meksıka turǵyndarynyń sondaı ańyzdy tamsana aıtyp júrýiniń ózi tańǵalarlyq» depti meksıkalyq aqyn Magda Evengalısta.
