Áleýmettik zertteýler – kóńil-kúı aınasy

Keshe Ortalyq kommýnıkasııalar qyzmetinde kezekti brıfıng boldy. Ony ótkizýge ótinish bildirgen «Zakon.kz» aqparattyq agenttigi men Áleýmettik-saıası zertteýler ınstıtýty eken. Brıfıngke osy eki uıymnyń basshylary, atap aıtqanda, «Zakon.kz» agenttiginiń bas redaktory Inna Rýdakova men Áleýmettik-saıası zertteý­ler ınstıtýtynyń dırektory Aıgúl Sádýaqasova keldi. Júrgizýshi «brıfıngte suraq qoıýǵa bolmaıdy» dep jýrnalısterdiń qulshynysyn birden tyıyp tastady. Sonymen, alǵashqy sóz I.Rýdakova hanymǵa berildi. Ol 26 sáýirde bolatyn prezıdenttik saılaýǵa úgit naýqany bastalǵanyn aıtty. Sosyn ózderiniń «Zakon.kz» aqparattyq portaly aldaǵy saılaý prosesin kórsetýge belsendi túrde aralasý týraly sheshim qabyldaǵanyn jetkizdi. Osyǵan oraı biz Áleýmettik-zertteýler ınstıtýtymen yntymaqtasatyn bolamyz, dedi ol. Odan ári ekzıt-pýldar, telefondyq saýaldamalar arqyly saılaý naýqanynyń barysy, halyqtyń kóńil-kúıi týraly aqparattar beriletinin aıtty. Sonymen birge, ol «ekzıt-pýldy» alǵash ret 1967 jyly jýrnalısterdiń oılap shyǵarǵanyn jetkizdi. Aıgúl Sádýaqasova ózi basqaratyn ınstıtýt saılaý barysyndaǵy ahýaldan áleýmettik zertteýlerdi júıeli túrde júrgizetinin aıtty. Apta saıyn qazaqstandyqtardyń saılaýǵa degen kózqarasy, kóńil-kúıi, oı-pikirlerin bilý maqsatymen telefon arqyly ekspress-saýaldama júrgizemiz. Alaıda, bul ádistiń birinshi kezeńi naýryzdyń 20-synan bastalǵan, biraq alǵashqy nátıjeleri áli joq, ol jaqyn kúnderde ǵana belgili bolady. Kelesi úsh kezeńi sáýirdiń 1-6, ekinshisi 8-14 jáne úshinshisi 15-19 aralyǵynda júrgiziledi. Bizdiń negizgi maqsatymyz – halyqtyń saılaý týraly aqparattandyrylý deńgeıin anyqtaý, saılaýǵa kózqarasyn bilý, daýys berýge qatysý deńgeıin anyqtaý jáne sońǵy kúni saılaýdan shyqqannan keıin ekzıt-pýl ádisimen arnaıy saýaldama júrgizý. Bul ádis álemdik tájirıbede bar. Bizde de, Qazaqstan táýelsizdigin alyp, demokratııalyq el bolǵannan beri osyndaı zertteýler ótkizilip keledi, dedi ol. Jaqsybaı SAMRAT, «Egemen Qazaqstan».