Semeı qalasyndaǵy Qaraǵaıly shaǵyn aýdanynda ornalasqan Respýblıka alańynda ótken «Semeı kóktemi» festıvali – osy aýqymdy bastamanyń alǵashqy legi edi. 14 naýryzdan bastalǵan is-sharada alańǵa sahna qurylyp, kıiz úıler tigildi. Teatrlandyrylǵan kóriniste kórisý dástúri, alastaý ǵurpy qazaq dúnıetanymynyń tereń qabaty retinde kórinis berdi.
Mádenı kúnderdiń ashylýyna arnaıy qatysqan oblys ákimi Berik Ýálı «Semeıdiń mádenı maýsymdary» jobasynyń mánin tarqatyp, onyń jyl boıy jalǵasatynyn jetkizdi.
«Bul bastama tórt mezgilge negizdelgen. «Semeı kóktemi», «Semeı jazy», «Semeı kúzi», «Semeı qysy» arqyly mádenı ómir úzdiksiz jalǵasady. Abaıdyń tórt mezgil týraly jyrlarymen úndesetin bul joba – rýhanı sabaqtastyqtyń belgisi», dedi óńir basshysy.
Rasynda, munda rámizdik astar bar. Abaı tórt mezgildi jyrlaý arqyly qazaqtyń ýaqytpen baılanysyn, tabıǵatpen úndestigin kórsetse, búgingi joba sol yrǵaqty qoǵamdyq ómirge kóshirýge talpynyp otyr.
Naýryznama onkúndigi de mazmun jaǵynan baıytylǵan. Ár kúnniń óz ataýy men ıdeıasy bar. Máselen, Kórisý kúninen bastalǵan mereke Qaıyrymdylyq kúni, Mádenıet kúni, Shańyraq kúni, Ulttyq kıim kúni, Ulttyq sport kúni sııaqty taqyryptyq baǵyttarmen jalǵasady. Sońǵy kúni «Tazarý kúni» retinde ekologııalyq aksııamen qorytyndylanady.
«Baǵdarlamalar konsertpen ǵana shektelmeıdi. Teatr qoıylymdary, mýzeılik ekskýrsııalar, qaıyrymdylyq aksııalary, aıtys, ulttyq sport jarystary – barlyǵy bir júıege biriktirilgen. Maqsat – ulttyq qundylyqtardy kúndelikti ómirge qaıta engizý», dedi Abaı oblysy mádenıet, tilderdi damytý jáne arhıv isi basqarmasynyń basshysy Janjigit Omarhan.
SEMEI
