Júgerini qaldyqsyz óńdeıtin kásiporyn

Toǵyz joldyń torabynda ornalasqan Shý aýdanyn­­­­da iri jobalar qolǵa aly­­­nyp jatyr. Birneshe jyl bu­­ryn qurylǵan «Jibek joly» ar­­naıy ekonomıkalyq aımaǵynda keıingi birer jyldyń bederinde 10 kásiporyn boı kóterip, 4 myń adamdy jumyspen qamtý kóz­del­gen. Al qytaılyq ınves­torlar qol­ǵa alǵan júgerini qal­dyqsyz óń­deıtin zaýyt qury­lysy búginde qarqyndy júrip jatyr.

«Kásiporyn qurylysyn júr­gi­zý maqsatynda myńdaǵan adam iske kiristi. Zaýyt ashylǵan kezde 1 500 azamat jumyspen qamtylady. Biz júgerini tereń óńdeý isine kirisý arqyly leısın, ızoleısın, valın, glýtamın, sıtrýlın sekildi amın qyshqyldaryn alamyz. Budan bólek, krahmal, glıýkoza jáne mal azyǵyn óndiremiz.

Jalpy alǵanda, jańa zaýytta jumys isteıtin mamandardyń 90 paıyzy jergilikti azamattar bolady. Jumysshylar aldaǵy jyldary shet memleketterde biliktiligin arttyrady. Shý aýdanyna uzyn sany 19 ınvestor keledi», deıdi «Shenqtai Biotech CO. LTD» JShS basshysynyń orynbasary Sıý Szın Chjao.

Mamandardyń sózine súıensek, zaýyttyń ónimdilik qýaty jylyna 500 myńnan 1 mln tonna júgeri óńdeýge deıin jetedi. Al kásiporyn tolyq qýatynda jumys istegen kezde bul kórsetkishti 3 mln tonnaǵa deıin jetkizý múmkindigi týmaq. Jańa zaýyt qurylysyn júrgizýge shamamen 420 mlrd teńge ınvestısııa tartylǵan.

Oblys ákimi Erbol Qarashókeev­­­­tiń aıtýynsha, jańa joba ońtústik óńir­lerdegi agro­­­­­óner­kásip salasyn damytýǵa aıryqsha serpin beredi. О́ıtkeni munda jumysty júıeli túrde júzege asyrýǵa barlyq múm­kin­dik qarastyrylǵan.

«Memleket basshysy óńdelgen aýyl sharýashylyǵy ónimderiniń úlesin 70 paıyzǵa jetkizý mindetin júktegeni málim. Biz tańdaǵan basym baǵyttyń biri – dándi daqyldardy tereń óńdeý. Bul joba – júktelgen mindetti júzege asyrýdyń naqty kórinisi. Irgesi qalanyp jatqan jańa zaýytta egistikten bastap, tutynýshyǵa deıingi joǵary su­­ryp­ty ónim óndiretin birtutas júıe qalyptastyrylǵan. Biregeı joba elimizdiń ońtústik óńir­le­rinde agroónerkásip keshenin qarqyndy túrde órkendetýge tyń serpin bereri anyq. Sondaı-aq aýyl sharýashylyǵy taýar óndirýshilerine turaqty tabys ákeledi», deıdi E.Qarashókeev.

Kompanııa basshylyǵynyń aıtýynsha, seriktestik qurylys jumysy kezinde negizinen qytaılyq tehnologııany qoldanady. Son­dyq­tan mamandar da atalǵan elden jumyldyrylatyny túsinikti. Alaıda zaýyt qurylysy aıaqtalǵannan keıin jumystyń basym bóligin jergilikti mamandar júzege asyrady.

«Jergilikti azamattardy ju­mys­pen qamtý týraly ýádemizge berik bolýǵa múddelimiz. Bul óz keze­ginde shyǵynymyzdy azaıtatynyn aıta ketken lázim. Bizdiń jos­­par boıynsha basqarý júıesindegi 50 maman ǵana Qytaıdan keledi. Qalǵan sharýany júzege asyrýǵa elimizdiń   azamattary jumysqa qabyldanatyny anyq. Biz qazir Almaty qalasy men Jambyl oblysyndaǵy ýnıversıtettermen sóılesip jatyrmyz. Olar bizge kerek mamandardy daıar­laý­ǵa kómektesedi. Jergilikti 40 stýdentti jańa tehnologııany meńgerý maqsatynda Qytaıǵa oqýǵa jiberip, olardyń biliktiligin art­tyr­dyq. Al kompanııa Jambyl oblysy aýmaǵynda tirkelgendikten, salyqtyq túsimder Jambyl oblysyna tólenedi», deıdi seriktestik basshysynyń orynbasary. 

Mamandar keltirgen derekke júgin­sek, zaýyt osy jyly ju­mys­ty ishinara bastaýǵa den qoıyp otyr. Naqtyraq aıtsaq, bıyl 500 myń tonna júgerini óńdeýge kúsh salmaq. Al 2027 jyly se­riktestik 1–1,5 mln tonna kóle­min­de júgeri sa­typ alýǵa bekinip otyr.

«Biz ózimizge qajetti júgeriniń bárin Qazaqstannyń ońtústik óńirlerinen alýǵa nıettimiz. Ál­bette, múmkindik jetse, eldiń bar­lyq óńirinen satyp alýǵa qaý­qa­rymyz jetedi. Sizderdiń kómek­terińizdiń arqasynda ońtús­tik­tegi sharýalardyń basym kópshiligi júgeri egedi dep senemin. Osy oraıda Jambyl oblysy ákimdigi men Aýyl sharýashylyǵy mınıstr­­­li­gi bizge qoldan kelgenshe qol­daý kórsetip otyrǵanyn aıta ketken jón. Al júgeriniń surpyna qatysty aıtar bolsam, bizdiń zaýytqa jergilikti ónim jaraıdy. Qandaı da bir talabymyz joq. Jumsaq júgerini ǵana qabyldaımyz. Sharýalar osyny nazarda ustasa deımiz. Al júgerini satyp alý naryqtyq baǵa júıesimen júzege asyrylady. Sebebi bizde bekitilgen naqty baǵa tarıfi joq», deıdi kompanııa ókili.

Seriktestik basshysynyń orynbasary keltirgen derekke júginsek, otandyq sharýalar júgeri alqabyn keńeıtýge nıettense, «Shenqtai Biotech CO. LTD» JShS tarapynan olarǵa tehnıkalyq kómek kórsetýge múmkindik bar. Alaıda jergilikti azamattarmen birlesip júgeri alqaptaryn keńeıte almaıdy. О́ıtkeni elimizdiń zańnamasynda sheteldik kompanııalardyń Qazaq­­stan aýmaǵynda mundaı jumys atqarýyna tyıym salynǵan.

«Zaýyt tolyq qýatynda jumys istegen kezde óndirilgen ónimdi Jerorta teńizi mańaıyndaǵy elderge, dálirek aıtsaq, Eýropa mem­le­ketteri men Soltústik Afrıka elderine eksporttaýǵa bel býyp otyrmyz. Ony naqty ýaqy­­­tyn­da júzege asyratyn ózimizdiń joba-josparymyz bar», deıdi ol.

Jumysyn kezeń-kezeńimen jandan­dyrýǵa táýekel etken zaýyt basshyly­ǵynan jergilikti aza­mat­tardyń jala­­qysy týraly da suradyq. Kompanııa basshy­ly­ǵynyń sózinshe, mundaǵy qyz­met­­ker­lerdiń eńbekaqysy 200 myń teńge­den 1 mıl­lıon teńge ara­ly­ǵynda bolmaq. Jala­qy kóle­mi qyz­met­kerdiń fýnk­sıo­nal­dyq min­de­tine baılanysty taǵaıyn­dalady.

«Kásiporynda jatyp jumys isteýge nıetti azamattarǵa arnalǵan eki birdeı jataqhanamyz bar. Olar­dyń osynda qalyp qyzmettik mindetin atqarýǵa eshqandaı kedergi joq. Árqaısysyna 900-den astam adam syıady. Budan bólek, otbasyly jumysshylarǵa arnalǵan páterler de bar. Al úıine baryp kelip jumys istegisi keletinderge arnaıy kólik qarastyrylǵan», deıdi seriktestik basshysynyń oryn­basary.

Kompanııa ýnıversıttermen keli­sim júrgizý aıasynda Qytaıǵa oqýǵa jibe­­rilgen jastardyń bárin ju­mys­qa qa­byldaǵan. Olar tek ju­mys isteý júıe­sin tolyq meń­ge­rý, kásibı bilikti­ligin jetil­dirý maq­satynda ǵana arnaıy kýrstarǵa jiberiledi. Zaýyt mańaıynda or­na­lasqan ashanada qazaqy mázir­ge saı taǵamdar daıyndalatynyn da aıta ketken jón. Bir sózben aıtqanda, júgerini tereńdetip óńdeıtin zaýytta jumys isteýge barlyq múmkindik qaras­ty­rylǵany kóńil toǵaıtady.

Jambyl oblysy,

Shý aýdany