Qar qursaýynan qutqaryldy

Atyraýdaǵy Qulsary qalasynyń 4 turǵyny 18 qańtarda túske jaqyn «Lada Granta» jeńil kóligimen Aqtóbe oblysyna barý úshin jolǵa shyǵypty. Olar Baıǵanın aýdanyndaǵy Oımaýyt aýylynda ótetin sadaqaǵa qatyspaq bolǵan. Jolaýshylar sol kúni keshkilik 17.00. saǵatta aǵaıyndarymen telefonmen baılanysyp, Qulsarydan 200 shaqyrym qashyqtaǵy «Qarajar qystaǵynyń mańyndamyz» depti. Sodan keıin olarmen birde-bir ret uıaly telefonmen baılanysý múmkin bolmaǵan. Telefon baılanysy úzilgenine alańdaǵan aǵaıyndarynyń habarlaýymen 19 qańtarda jolaýshylardy izdeý bastaldy. Izdeý jumystaryna tótenshe jaǵdaılar departamentinen «Trekol» jol talǵamaıtyn kóligi, qutqarýshylar men dáriger jumyldyryldy. Kómekke «Dossormunaıgaz» basqarmasynan bir «Djıp» kólik pen munaıshylar da qol ushyn sozdy. Izdeýshiler keshke jaqyn jolaýshylardy Qyzylqoǵa aýdany aýmaǵyndaǵy «Aqsýat» qystaýynan 18 shaqyrym jerden tapty. Belgili bolǵanyndaı, jolaýshylar kóligi qarǵa batyp qalypty. Bul mańda uıaly baılanys jelisi ustamaıdy eken. Kóliktegi tórt jolaýshy – eki er jáne eki áıel adam qutqaryldy. Joldasbek ShО́PEǴUL, «Egemen Qazaqstan». Atyraý oblysy. sýret : http://img.nur.kz