Sýretti túsirgender – A.Dúısenbaev, E.ÚKIBAEV
«Biz Halyq Konstıtýsııasyn keleshek urpaq aldyndaǵy jaýapkershiligimizdi tereń sezine otyryp qabyldadyq. Ata zań – qýatty, kúshti, básekege qabiletti Qazaqstannyń jańa Jarǵysy. Jańa Konstıtýsııa – kóne zamannan beri babalarymyzǵa baǵdar bolǵan dala zańdarynyń búgingi jalǵasy, urpaqtar arasyndaǵy sabaqtastyq kórinisi», dep atap ótti Qasym-Jomart Toqaev Konstıtýsııany qabyldaýǵa arnalǵan saltanatty jıynda.
Prezıdent aıtqandaı, Ata zań – memleketimizdiń uzaqmerzimdi maqsat-muratyn aıqyndaıtyn, ultymyzdyń keleshek taǵdyryna tikeleı áser etetin tarıhı qujat. Sondyqtan Negizgi zańnyń qabyldanýy eldiń saıası júıesin jańǵyrtyp qana qoımaı, qoǵamdaǵy ádildik pen zań ústemdigin nyǵaıtýǵa jol ashady. Bul – zaman talabyna saı ózgeristerdiń kórinisi, halyqtyń suranysyna jaýap bergen mańyzdy sheshim.
Otandyq jáne sheteldik sarapshylar elimizde sátti ótken Konstıtýsııalyq reformany, keshegi jalpyulttyq referendým men jańa Konstıtýsııanyń qabyldanýyn «Halyq únine qulaq asatyn memleket» tujyrymdamasynyń shynaıy júzege asýy dep baǵalap otyr. Osnabrıýk ýnıversıtetiniń (Germanııa) professory Georg Gesktiń aıtýynsha, el ómirine qatysty mańyzdy sheshim qabyldar kezde óz azamattarynan «Sender muny qalaısyńdar ma?» dep suraý dástúri álemniń kóp memleketinde kezdespeıdi. Ol bizdiń elimizde demokratııa qaǵıdattary saltanat quryp, jańa Konstıtýsııany qabyldaýda halyqtyń pikiri tolyqtaı eskerilgenin, al aýqymdy reforma azamattardyń belsendi atsalysýymen júzege asqanyn atap ótti.
Halyqtyń qoldaýymen ómirge kelgen jańa Konstıtýsııamyz adam quqyqtary men bostandyqtaryn qorǵaý máselesine erekshe mán berýimen de aıryqsha mánge ıe. Qujatta adam quqyǵy memlekettiń eń joǵary qundylyǵy ekeni aıqyn kórsetilip, onyń saqtalýyna kepildik beretin normalar kúsheıtildi. Bul óz kezeginde árbir azamattyń zań aldynda teń bolýyn qamtamasyz etip, qoǵamdaǵy senim men turaqtylyqty arttyrady.
Eń bastysy, jańa Ata zańymyz Qazaq eliniń myńjyldyq memlekettilik tarıhyn taıǵa tańba basqandaı shegelep, Egemendigimiz ben Táýelsizdigimizdiń tuǵyryn bıiktetti. Prezıdent atap ótkendeı, onyń ár normasy, ár tarmaǵy Táýelsizdigimizdi nyǵaıta túsedi.
Jańa Konstıtýsııa 1 shildeden bastap resmı túrde óz kúshine enedi. Al elimizde jańa merekelik data ómirge keldi. Aldaǵy jyldan bastap 15 naýryzdy memlekettik mereke – Konstıtýsııa kúni retinde ulttyq deńgeıde atap ótetin bolamyz.
