Akterdiń qazasyna baılanysty kóńil aıtqandar qatarynda Jan-Klod Van Damm, Donald Tramp jáne basqa da tanymal tulǵalar bar. О́liminiń naqty sebebi jarııalanǵan joq.
Otbasynyń málimetinshe, Norrıs 20 naýryz kúni tańerteń, Gavaıdaǵy Kaýaı aralynda dúnıeden ótken. Buǵan deıin BAQ-ta onyń aýrýhanaǵa túskeni týraly aqparat taraǵan edi.
«Chak Norrıs álem úshin jekpe-jek sheberi, akter jáne kúsh-jigerdiń sımvoly boldy. Al biz úshin ol – adal jar, qamqor áke men ata, súıikti baýyr jáne otbasymyzdyń tiregi edi», delingen otbasy málimdemesinde.
Jaqyndary onyń otbasynyń ortasynda, tynysh jaǵdaıda ómirden ótkenin aıtty.
Chak Norrıstiń shyn esimi – Karlos Reı Norrıs. Ol 1940 jyly Oklahoma shtatynda dúnıege kelgen. Áskerı qyzmetin Ońtústik Koreıada ótep júrgende «Chak» degen laqap at alǵan.
1960-jyldary jekpe-jek óneri stýdııasyn ashyp, keıin kıno salasyna qadam basty. Alǵash ret 1968 jyly fılmde epızodtyq rólde kórindi. 1972 jyly Brıýs Lımen birge «Aıdahar joly» fılminde oınap, keńinen tanyldy.
Onyń eń tanymal jumystarynyń biri – «Jalǵyz qasqyr Makkýeıd» fılmi jáne «Ýoker, Tehas reındjeri» telehıkaıasyndaǵy Kordell Ýoker róli.
Kıno synshylary onyń fılmderin jıi synaǵanymen, kórermender Norrısti ádildik úshin kúresetin batyl keıipker retinde erekshe qabyldady.
Chak Norrıs tórt balanyń ákesi bolǵan. Ol otbasyn árdaıym basty qundylyq retinde baǵalaǵan.
