Sońǵy jyldary elimizde Ulttyq sport kúni Naýryz meıramynyń ajyramas bóligine aınaldy. Bıylǵy naýryzdyń 20-sy Batys Qazaqstan óńirinde ulttyq dástúr men zamanaýı úrdisterdi ushtastyrǵan taǵylymdy shara uıymdastyrylyp, «Babalar izimen» ulttyq sport lıgasynyń saltanatty ashylýy ótti.
Birneshe bólimnen turǵan aýqymdy merekelik baǵdarlamaǵa eki myńǵa jýyq qonaq pen sportshy qatysyp, tól murany dáripteýdiń jarqyn úlgisi kórsetti.
Shara aıasynda uıymdastyrylǵan «NatRoboCom» atty robottar jarysy tyń bastamanyń biri boldy. Memleket basshysy bekitken Sıfrlandyrý jáne jasandy ıntellekt jylyna oraılastyrylǵan jarysta robottar ózara arqan tartysyp, asyq atyp synǵa tústi. Sondaı-aq «roboqyzqýý» men «roboaqsúıek» oıyndarynyń kórsetilimi usynylyp, sıfrlyq tehnologııa arqyly ulttyq oıyndardyń jańa tynysy ashyldy.
Árıne, bul kúni naǵyz ulttyq sport túrleri de qyzdy. Kir tasyn kóterip, qazaq kúresinen kúsh synasqan palýandar, dástúrli sadaqtan nysana kózdegen mergender, asyq atqan alǵyrlar, toǵyzqumalaqty tez oınap, mı shynyqtyrǵan myqtylar maıdanǵa tústi. Odan bólek qolóner kórmesi uıymdastyrylyp, qamshy órý, at taǵalaý, ulttyq buıymdar jasaý boıynsha sheberlik saǵattary ótkizildi. Qonaqtarǵa qazaqtyń ulttyq taǵamy usynylyp, naýryzdyń berekeli dastarhany jaıyldy.
«Naýryz – jańarý men jańǵyrýdyń, yrys pen yntymaqtyń, bereke men birliktiń meıramy. Memleket basshysy Qasym-Jomart Toqaevtyń bastamasymen bıyl úshinshi jyl qatarynan Naýryznama onkúndigin ótkizip kelemiz. Osy Naýryznama aıasynda ótip jatqan Ulttyq sport kúni jas urpaqtyń boıynda ulttyq rýhty ústem etýge baǵyttalǵan mańyzdy qadam. Bul – bizdiń tarıhymyz, salt-dástúrimiz, rýhanı qundylyǵymyz. Ulttyq oıyndardy ulyqtap, tól sportty tórge ozdyrý – bárimizdiń ortaq mindetimiz, babalar amanatyna adaldyq. Aımaqta bul baǵyttaǵy jumys júıeli túrde jalǵasyp jatyr», dedi oblys ákimi Narıman Tóreǵalıuly «Babalar izimen» ulttyq sport lıgasynyń saltanatty ashylý rásiminde.
Aıta keteıik, «Babalar izimen» ulttyq sport lıgasy – halqymyzdyń dástúrli oıyndary men sport túrlerin jańǵyrtýǵa baǵyttalǵan mańyzdy joba.
Uıymdastyrýshylardyń pikirinshe, bul bastama ulttyq qundylyqtardy dáriptep qana qoımaı, jas urpaqty rýhanı muraǵa jaqyndata túspek.
