foto: Aqorda
«Búgin atajurtymyzdyń altyn besigi – Túrkistan shaharyna taǵzym etý úshin arnaıy kelip otyrmyn. Rızamyn.
Meniń Túrkistanǵa yqylasym erekshe ekenin jaqsy bilesizder. Memleket basshysy retinde alǵashqy saparymdy osy ólkeden bastadym. Túrkistan – túbi bir túrki jurtynyń qasıetti shańyraǵy», dedi Memleket basshysy.
Prezıdenttiń aıtýynsha, Túrkistan – halqymyzdyń bolmys-bitimi, qaısar rýhy, teńdessiz mádenıeti jáne eldik dástúri kórinis tapqan kıeli jer.
«Áıgili Qoja Ahmet Iаsaýıdiń mol murasy – shejireli shahardyń rýhanı qazynasy.
Áziret Sultan kesenesi – túrki áleminiń berekeli tutastyǵynyń sımvoly. Tól tarıhymyzda esimi altyn árippen jazylǵan tuǵyrly tulǵalarymyz osy jerde máńgilik mekenin tapqan», dedi Q.Toqaev.
Prezıdenttiń aıtýynsha, bul óńirde ultymyzdyń taǵdyryn aıqyndaǵan asa mańyzdy sheshimder qabyldandy.
«Túrkistan – Qazaq handyǵynyń saıası ortalyǵynyń biri ekenin eshqashan umytpaýymyz kerek. Bul óńirde ultymyzdyń taǵdyryn aıqyndaǵan asa mańyzdy sheshimder qabyldandy. Ordabasy jerinde osydan úsh ǵasyr buryn el bolashaǵyna aıryqsha áser etken úlken Quryltaı ótti. Bul biregeı jıynnyń mán-maǵynasy asa erekshe.
Quryltaıda úsh júzdiń bıleri jáne ıgi jaqsylary túgel bas qosyp, bir týdyń astyna jınaldy. Ult birliginiń arqasynda batyr babalarymyz Ańyraqaı shaıqasynda tarıhı jeńiske jetip, búkil syrt elderge qazaq eli tutastyǵynyń kúshin pash etti.
«Osyndaı eldik pen erlik dástúri eshqashan úzilgen emes. Biz de tarıh jolyn jalǵastyryp, elimizde tóreli jıyn, tóbeli basqosýlar ótkizip kelemiz. Ulttyq quryltaıdyń ekinshi otyrysy Túrkistanda ótkenin jaqsy bilesizder. Men osy jerde «Adal azamat» tujyrymdamasyn alǵash ret jarııaladym.
Mamyr aıynyń ortasynda Túrkistanda Túrki memleketteri uıymynyń aıasyndaǵy tıisti memleketter basshylarynyń eń joǵary deńgeıdegi jıyny josparlanyp otyr. Bul – qazirgi álemdegi qubylmaly ahýalda ótkiziletin óte mańyzdy halyqaralyq shara. Úkimet pen ákimdik osy jıyndy minsiz uıymdastyrýǵa mán berýi kerek», dedi el Prezıdenti.
Aıta keteıik, búgin Memleket basshysy Qasym-Jomart Toqaev Túrkistan oblysyna jumys saparymen baryp, Qoja Ahmet Iаsaýı kesenesine zııarat etti.
