«Men Prezıdent retinde elimizdiń jastaryna, olardyń bilimine, qabiletine, kúsh-qýatyna zor úmit artamyn. Elimizge jany ashıtyn, ıaǵnı shyn máninde janashyr urpaq qana Qazaqstannyń kórkeıýine mol úles qosa alady. Elimizdiń keleshegi – otanshyl, jasampaz, jaýapkershiligi mol jastardyń qolynda. Bul da aqıqat desek, oryndy bolar», dedi Memleket basshysy.
Prezıdent naǵyz otanshyl azamat degenimiz, bul – eń aldymen óz jumysyn adal oryndap, adal eńbek etip jatqan adam ekenin aıtty.
«Adal eńbekpen kelgen tabys berekeli bolady. Jalqaý, erinshek adam eshqashan otanshyl azamat bola almaıdy. Qoǵamymyzǵa jalań uran, bos áńgime, qurǵaq ýáde, qyzyl sóz kerek emes, naqty is qajet. Otanshyldyq degenimiz ádemi sóz sóılep, jurt aldynda keremet bolyp kóriný emes, bul – eń aldymen elge paıda ákelý, Otanǵa degen adaldyqty naqty ispen kórsetý», dedi Memleket basshysy.
Sonymen qatar Prezıdent Qazir Túrkistan oblysynda 700 myńǵa jýyq jas azamat turatynyn aıtty.
«Bul – turǵyndardyń úshten biri degen sóz. Kıeli ordanyń tarıhy qandaı tereń bolsa, bolashaǵy da sondaı jarqyn bolady dep senimdi túrde aıtýǵa bolady», dedi Q.Toqaev.
Memleket basshysy óz sózinde eńbekqorlyq halqymyzdyń bolmysyna sińgen qasıet bolýǵa tıis ekenin basa aıtty.
«Balabaqshada, mektepte, ýnıversıtette, ǵylym ınstıtýtynda, medısınada, óndiris mekemesinde, saýda jáne qyzmet kórsetý oryndarynda, tipti, memlekettik qyzmet pen áskerı salanyń ózin aıtpaǵanda, barlyq saladaǵy basty qundylyq – adal eńbek, adal qyzmet bolýǵa tıis.
Osy maqsatpen ótken jyldy búkil el bolyp jumysshy mamandyqtaryn dáripteýge, olarǵa qurmet kórsetýge arnadyq. Bul kezekti naýqan emes, memlekettik ıdeologııanyń bir bóligi, sondyqtan osy jumyspen únemi aınalysýymyz kerek. Jumystyń jamany bolmaıdy. Adal jumystan uıalýdyń eshqandaı qajeti joq. Eńbektiń bári qadirli. Bul danalyqty jastardyń bári jaqsy túsinýi kerek», dep atap ótti Prezıdent.
Aıta keteıik, búgin Memleket basshysy Qasym-Jomart Toqaev Túrkistan oblysyna jumys saparymen baryp, Qoja Ahmet Iаsaýı kesenesine zııarat etti.
Memleket basshysy: El qoldaýyna ıe bolǵan naǵyz Halyq Konstıtýsııasy tuǵyryna qondy
