Bir kúni jylǵa azyq bolatyn altyn kúzde sapaly aýyl sharýashylyǵy ónimderin ósirý, saqtaý jáne qaıta óńdeý jumysy Jetisý jerinde de qaýyrt júrýde. Osy oraıda Almaty oblysy azyq-túlikpen ózin-ózi qamtamasyz etýmen shektelip qalmaı irgedegi Almaty qalasynyń turǵyndaryna da tıimdi baǵamen et, sút, jemis-jıdek ónimderin usynýda. Nátıjesin halyq kórip otyr. Sondyqtan Elbasynyń sapaly otandyq ónimderdi shyǵarý týraly tapsyrmasyn der kezinde oryndaý maqsatynda Almaty oblysynyń ákimi Amandyq Batalov taıaýda Kerbulaq, Talǵar aýdandarynda boldy. Kerbulaq aýdanynda aýyl sharýashylyǵy ónimderin óndirý máselesine basa nazar aýdardy. Talǵar aýdany aýmaǵynda ornalasqan Qazaq taǵamtaný akademııasynyń «Amıran» zaýytynda shyǵarylatyn balalarǵa arnalǵan sút jáne sút taǵamdarynyń sapasyna erekshe kóńil bóldi. Bul óndiris ornynda búginde 87 adam eńbek etedi. Aǵymdaǵy jyldyń tórt aıynda 315,2 tonna sútten 203,8 mln.teńgege 394 tonna ónim, ıaǵnı 11 túrli adamzat aǵzasyna paıdaly jáne emdik mıkroorganızmderge baı sút paketterin óndirdi. Veterınarııalyq talapqa saı sıyr saýatyn qoralar amerıkalyq «Baumatic» fırmasynyń apparattarymen jabdyqtalǵan.
О́ńir basshysy bul kúni «Fresh Frýd Kazahstan» JShS jemis-jıdekter saqtaý men satý qoımalarynda boldy. Byltyrǵy jyly iske qosylyp, búginde 30 adamdy jumyspen qamtyp otyrǵan bul keshen avstralııalyq tehnologııamen salynǵan. Ǵımarat qurylymy men ondaǵy ornatylǵan germanııalyq joǵary tehnologııaly qural-jabdyqtar jergilikti jemis-jıdekterdi, sonymen qatar syrttan ákelingen ekzotıkalyq ónimderdi jyl boıy saqtaýǵa múmkindik beredi. Basty ereksheligi – kompanııa jemis-jıdek ónimderin uzaq ýaqyt saqtaý júıesiniń arqasynda olardy jyl maýsymyna qaramastan ótkizýge múmkindigi bar. «Agrobıznes-2020» baǵdarlamasy sheńberinde «Fresh Frýd Kazahstan» JShS-niń ınvestısııalyq salymy 68,6 mln. teńgege sýbsıdııalandy. Aýyl sharýashylyǵy ónimderin ósirý, saqtaý jáne qaıta óńdeý jumysyn pysyqtap, talapqa saı atqarylýyn táptishtegen óńir basshysy Amandyq Batalov eki kúndik jumys saparyn qorytyndylaı kele: – Agrarly oblysymyzda aýyl sharýashylyǵy ónimderin óndirýde úlgi tutar jumysymyz barshylyq. Al olardy talapqa saı qaıta óńdeý máselesi birtindep durys sheshimin tabýda. Sonyń bir dáleli retinde Talǵar aýdanyndaǵy «Amıran» syndy óndiris ornynyń ilkimdi isin aıtýǵa bolady. Tutastaı alǵanda, Jetisý jerinde óndiris oryndaryn memlekettik talapqa saı ashý, eń bastysy bastalǵan jumysty toqtatpaı turǵylyqty halyqty turaqty jumys ornymen qamtamasyz etý basty ustanymymyz bolyp otyr, – dedi.
Nurbol ÁLDIBAEV, «Egemen Qazaqstan».
Almaty oblysy.
