«Progress M-26M» júk kemesi sýǵa batyrylady
Halyqaralyq ǵarysh stansasynyń quramynda jumys istegen «Progress M-26M» kemesi stansadan ajyratylyp, orbıtadan shyǵarylǵan soń, Tynyq muhıtynyń keme júrmeıtin aýdandarynda sýǵa batyrylady.
Reseı Ushýlardy basqarý ortalyǵy ókiliniń habarlaýynsha, ushý kezinde qyzmetin ótegen jabdyqtar men ekıpajdyń ómir tirshiliginiń qaldyqtary tıelgen keme Halyqaralyq ǵarysh stansasynan jergilikti ýaqyt boıynsha saǵat 13.18-de ajyratylady. Al saǵat 16.28-de qozǵaltqyshtary tejelip, odan keıin «Progress» jer atmosferasynyń tyǵyz qabattaryna kiredi. Ǵarysh kemesiniń órtelmegen bólikterin Tynyq muhıty sýyna túsirý saǵat 17.17-de júzege asyrylady. Baıqońyrdan ushyrylǵan «Progress» júk kemesi buǵan deıin HǴS ekıpajyna otyn, ottegi, azyq-túlik, ǵylymı tájirıbelerge arnalǵan apparatýra jáne astronavtar úshin sálemdemeler jetkizgen edi.
Sodyrlar kúrdterge qarsy hımııalyq qarý qoldanǵan ba?
AQSh bıligi «Islam memleketi» terrorshyl toptaryna Irakta hımııalyq qarý qoldanǵan degen kúdik keltirdi. Keıbir basylymdardyń jazýynsha, joǵary shendi sheneýnikter «Islam memleketiniń» sodyrlary osy aptada kúrdterge jasaǵan shabýyly kezinde adamdy ýlandyratyn ıprıt gazyn qoldanǵan, dep boljaıdy.
Basylym, sondaı-aq, «Islam memleketiniń» sodyrlary ıprıt gazyn Sırııadan tapqan bolýy yqtımal ekendigin keltiredi. О́ıtkeni, bul eldiń úkimeti 2013 jyly adam ómirine qaýipti ýly zattyń kóp kólemde saqtalǵanyn moıyndaǵan edi. Sodyrlar ıprıtti Iraktan alý múmkindigin de joqqa shyǵarmaıdy. Qazirgi kezde AQSh-tyń arnaıy qyzmeti atalǵan máseleni tekserýdi qolǵa alǵan.
«Eń qaýipti adam» túrmede ajal qushty
Kalıfornııa shtatyndaǵy Folsom qalasyndaǵy «Sakramento» atalatyn túrmede bolǵan tártipsizdikter kezinde bir adam ólip, on bir jazasyn óteýshi aýrýhanaǵa jetkizilgen.
Aqparat agenttikteriniń habarlaýynsha, 71 jastaǵy Hıýgo Pınell esimdi ólgen álgi adamdy «Kalıfornııanyń túrme júıesindegi eń qaýipti adam» dep ataıdy eken. Sondaı-aq, ómir boıy túrmede otyrý jazasyna kesilgen ol afroamerıkalyq túrmelerde solshyl radıkaldyq top – «Qara partızandyq otbasyn» uıymdastyrýshy Djordj Djeksonnyń jaqyn dosy bolǵan kórinedi. Al túrmedegi tártipsizdikke 70-ten astam jazasyn óteýshi qatysqan. Tártipsizdik H.Pınelldi óltirý úshin ádeıi uıymdastyrylǵan degen boljam da bar.
Qysqa qaıyryp aıtqanda:
● Qytaıdyń Gýandýn provınsııasyndaǵy Dýngýan qalasynda salynyp jatqan metro stansasynyń ústi opyrylyp, jerasty qazanshuńqyryna qulaǵan. Opyrylý aýdany 300-den astam sharshy metrdi quraıdy.
● Osy aptada Mysyrda bolǵan aptap ystyq saldarynan kóz jumǵandardyń sany 76 adamǵa jetti. Olardyń kópshiligi egde jastaǵylar.
● Japonııa atom elektr stansasynyń osy aptada iske qosylǵan «Sendaı» birinshi energııalyq blogy elektr energııasyn óndire bastady.
● Aýǵanstannyń qorǵanys mınıstrligi tájik-aýǵan shekarasynda eki mınanyń Tájikstan aýmaǵynda jarylýyna baılanysty Dýshanbeden resmı túrde keshirim surady.
Mıssııa jetekshisi janjalǵa baılanysty otstavkaǵa jiberildi
BUU-nyń Ortalyq Afrıka Respýblıkasyndaǵy kópbeıindi keshendik mıssııasynyń basshysy Babakar Gaıe otstavkaǵa ketti. Buǵan osy eldegi bitimger áskerılerdiń 12 jastaǵy qyz balany zorlaǵany jáne olardyń el astanasy – Bangıde ákeli-balaly ekeýdi atyp tastaǵany sebep bolǵan.
«Reıter» agenttiginiń habarlaýynsha, B.Gaıe otstavkaǵa ketý jóninde ózi suranǵan. Osyǵan baılanysty BUU-nyń Bas hatshysy Pan Gı Mýn: «Búgin men ózimniń Ortalyq Afrıka Respýblıkasyndaǵy arnaıy ókil Babakar Gaıeniń otstavkasyn qabyldadym», – dep málimdegen. Quqyq qorǵaýshylardyń málimetine qaraǵanda, bitimger áskerılerdiń biri qyzdy 2 tamyzda zorlaǵan, al eki adamdy 3 tamyzda atyp óltirgen.
«Talıban» sodyrlary 15 tártip saqshysyn atyp ketti
sh
Polıseılerdiń kıimin kıip alyp, kúsh qurylymnyń ǵımaratyna kirgen «Talıban» qozǵalysynyń sodyrlary quqyq qorǵaý organdarynyń 15 qyzmetkerin mert qyldy. Qaıǵyly oqıǵa Aýǵanstannyń Gılmend provınsııasynda oryn aldy.
Derek kózderine qaraǵanda, sodyrlar mekeme ǵımaratyna polısııa avtomobılderimen kelgen. Sonda 14 tártip saqshysyn óltirip, olardyń qarýlaryn ózderimen birge ala ketken. Odan keıin baqylaý-ótkizý pýnktinde kúzette turǵan taǵy bir polıseıdi oqqa baılaǵan. Keıbir málimetter boıynsha, olar el aýmaǵynyń 70 paıyzyna jýyǵyna baqylaý jasaıtyn kórinedi. Uıymnyń belsendi sodyrlarynyń sany 27 myń adamnan asady degen derek bar. Al BUU osy jyldyń alǵashqy alty aıynda ıslamshylardyń Aýǵanstan bıligimen bolǵan janjaldar saldarynan qaza tapqan jáne jaralanǵandar sany 5 myń adamǵa jýyqtaıdy degen málimet keltiredi.
Jarylystan 60 adam qaza tapty
Iraktaǵy joıqyn jarylystan 60 adam opat bolyp, 200-ge jýyq turǵyn túrli dárejede jaraqat aldy. Bul jóninde polıseıler men medısına qyzmetkerleriniń aıtqandaryna silteme jasaı otyryp, «Reıter» agenttigi habarlady.
Bul terrorlyq áreket Baǵdattyń negizinen shııtter qonystanǵan Sadr-sıtı aýdanyndaǵy bazarda jarylǵysh zattar toltyrylǵan fýrgon-refrıjeratordyń jarylýy arqyly jasalǵan. Irakta adam ólimine soqtyrǵan terrorlyq áreketter jıi kórinis berýde. Mysaly, osy jyldyń 22 maýsymynda Baǵdatta eki avtomobılge qoıylǵan bombanyń iske qosylýynan 26 adam qaza tapsa, qasıetti Ramazan aıynda avtokólikke tıelgen úsh tonnadaı jarylǵysh zattyń jarylýynan 100 adam qurban bolǵan edi.
