Qyzylorda oblysynyń kásipkerler palatasynyń Qarmaqshy aýdandyq fılıalyndaǵy kásipkerlikti qoldaý ortalyǵy aýdandaǵy mańyzdy máseleni sheshýge kómektesti. Aýdan oblys ortalyǵynan 170 shaqyrym qashyqtyqta ornalasqan. Aýdanda 2 kent, 12 aýyldyq okrýg, 14 derbes bólim, 31 bilim ortalyǵy bolǵanymen, osy ýaqytqa deıin birde-bir jarnama agenttigi joq edi. Sondyqtan aýdandaǵy mekemeler men kásipkerler ózderine qajetti syrtqy jarnama quraldaryn (bılbord, banner, stendter, t.b.) oblys ortalyǵy – Qyzylorda qalasyna kelip jasatatyn. Qarmaqshy aýdanyndaǵy kásipkerlikti qoldaý ortalyǵyna Meıirbek Tólepbergenov esimdi jas jigit: «Kompıýterlik jáne qosalqy tehnıkany jóndeý jáne olarǵa qyzmet kórsetýge qatysty kásip ashqym keledi» dep kelgende, ortalyq keńesshileri aýdanda suranysqa ıe kásip túri retinde jarnama agenttigin ashýdy usyndy. Osyǵan oraı Meıirbektiń ózi: «Men 2013 jyldan beri túrli qarjy ınstıtýttaryna baryp, jobamdy qarjylandyra almaı júrdim. Aýdanymyzda kásipkerlikti qoldaý ortalyǵynyń ashylǵany jaqsy boldy. Birinshiden, ortalyq bıznestiń tıimdi baǵytyn anyqtap berýge kómektesti, ekinshiden, sapaly bıznes-jospar ázirlep berdi. Nátıjesinde jalpy quny 7,5 mln. teńge turatyn jobam «Qyzylorda» óńirlik ınvestısııalyq ortalyǵy arqyly qarjylandyrylyp, jumysty bastap kettim. Qazir aýdanda meniń qyzmetime suranys joǵary», – deıdi. Aıta ketý kerek, Qarmaqshy aýdandyq kásipkerlikti qoldaý ortalyǵy osy kezge deıin 425 azamatqa 605 qyzmet kórsetti, sonyń ishinde 61 joba qarjylandyryldy.
«Egemen-aqparat».
