Kórmeniń maqsaty – adamzattyń ǵaryshqa alǵash ushýynan bas-tap elimizdiń qazirgi zamanǵy ǵarysh salasynyń qalyptasýy men damýyna deıingi tarıhı sabaqtastyqty kórsetý, sondaı-aq elimizdiń jetistikterindegi onyń rólin aıqyndaý. Sonymen birge bul kórme elimizdiń ǵarysh murasyn nasıhattaýǵa, salanyń ınnovasııalyq damýynyń úlgisi retinde kommersııalyq ǵarysh týrızminiń 25 jyldyǵyn tanytýǵa baǵyttalǵan.
Is-sharanyń ashylýynda Prezıdenttik ortalyqtyń dırektory Baqytjan Temirbolat kórmeniń mańyzyna aıryqsha toqtaldy.
«Bul kúnniń elimiz úshin orny bólek. О́ıtkeni dál osy qazaq jerinde adamzat órkenıetiniń ǵarysh dáýiri bastaldy. Iýrıı Gagarınniń ǵaryshqa ushýy ǵylymı-tehnıkalyq progrestiń uly rámizine aınalyp, adam múmkindiginiń sheksizdigin tanytty. Ǵarysh salasy úshin mereıtoılyq bul jyldyń el táýelsizdiginiń 35 jyldyǵymen tuspa-tus kelýi de tereń rámizdik mánge ıe. 1991 jyly Qazaqstan egemendiginiń rámizdik bastaýy Toqtar Áýbákirovtiń ǵaryshqa ushýymen astasyp jatyr. Atalǵan tarıhı oqıǵanyń 35 jyldyǵymen qatar, aıtýly tulǵanyń 80 jyldyq mereıtoıyn da atap ótemiz. Sondaı-aq bıyl taǵy bir dańqty otandyq ǵaryshker Talǵat Musabaevtyń 75 jyldyǵy atalyp óter edi», dedi ol.
Kórme eki bólimnen jasaqtalǵan. Oǵan 30-ǵa jýyq eksponat pen 60-tan astam arhıv materıaly usynyldy. Birinshi «Sheksiz ǵaryshqa alǵashqy qadam» degen bólimde – Iýrıı Gagarınniń alǵashqy ǵaryshqa ushqan tarıhı mańyzy kórsetilip, adamzattyń ony ıgerýindegi jańa dáýirdiń bastalǵany baıandalǵan.
Al ekinshi bólim «Qazaqstan jáne ǵarysh» dep ataldy. Onda elimizdegi ǵarysh salasynyń damýy týraly materıaldar qoıyldy. Ásirese otandyq ǵaryshkerler Toqtar Áýbákirov, Talǵat Musabaev pen Aıdyn Aıymbetovtiń jetistikteri kópshiliktiń qyzyǵýshylyǵyn týǵyzdy. Sondaı-aq bul bólimde alǵashqy ǵarysh týrısi Dennıs Tıto týraly da aıtylady.
Azamat QUSAIYN
