Foto: Ashyq derekkóz
Keńes barysynda Ishki ister mınıstrligimen birlesip, rásimniń ashyqtyǵy men ádildigin arttyrý, azamattar úshin qolaılylyqty kúsheıtý, sybaılas jemqorlyq táýekelderin azaıtý jáne júrgizýshilerdi daıarlaý sapasyn jaqsartý basty baǵyt retinde aıqyndaldy.
Birinshi kezekte, jańa normalarǵa sáıkes azamattar júrgizýshi kýáligin alý úshin emtıhandy aqyly negizde shekteýsiz tapsyra alady. Bul rette ár áreket arasyndaǵy aralyq keminde 10 kúntizbelik kún bolýy tıis. Buǵan deıin azamattarǵa 3 tegin múmkindik beriletin: alǵashqy ekeýi – 1 kún aralyqpen, úshinshisi – 30 kúnnen keıin. Osy múmkindikter taýsylǵan soń qaıta oqýdan ótý talaby qoıylatyn. Mundaı shekteýler keı jaǵdaıda zańsyz joldarǵa ıtermeleıtini eskerilip, artyq tosqaýyldar alynyp tastaldy.
Ekinshi mańyzdy qadam – teorııalyq emtıhan júıesine akademııalyq adaldyqty qamtamasyz etetin tehnologııalardy engizý. Bul baǵytta Ǵylym jáne joǵary bilim mınıstrliginiń Ulttyq testileý ortalyǵynyń Astana qalasyndaǵy fılıaly bazasynda pılottyq joba iske qosylady. Ortalyqta qoldanylatyn baqylaý tehnologııalary synaqtan ótkizilip, keıin búkil júıege engiziledi. Sonymen qatar test tapsyrmalaryna keshendi psıhometrııalyq zertteý júrgizilip, olardyń júrgizýshiniń qaýipsizdikke qajetti bilimin naqty baǵalaý múmkindigi tekseriledi.
Úshinshi jáne tórtinshi baǵyttardyń sheńberinde emtıhan úderisine jasandy ıntellekt tehnologııalary engiziledi. Teorııalyq synaq kezinde tolyqtyrylǵan shynaıylyq (AR) qoldanylsa, praktıkalyq emtıhandy baqylaýda Computer Vision tehnologııasy paıdalanylady. Bul tyıym salynǵan quraldardy qoldaný táýekelin azaıtyp, barlyq buzýshylyqty naqty tirkeýge múmkindik beredi.
Endi avtokólik jýý oryndary jańa talap boıynsha jumys isteıdi
Besinshi baǵyt – sıfrlyq sheshimderdiń qaýipsizdigin kúsheıtý. Júrgizýshi kýáligin alýǵa qatysty júıelerdi aqparattandyrýdyń asa mańyzdy obektileri tizbesine engizý máselesi qarastyrylyp jatyr. Bul ruqsatsyz aralasý men quqyq buzýshylyqtarǵa jaýapkershilikti kúsheıtýge, qajet bolǵan jaǵdaıda qylmystyq jaýapkershilikke deıin jetkizýge jol ashady.
Altynshy shara retinde ákimshilik jaýapkershilik engizý kózdelgen. Ol tek qyzmet alýshylarǵa ǵana emes, zańsyz áreketterge járdemdesetin tulǵalarǵa da qoldanylady. Atap aıtqanda, emtıhan kezinde mıkroqulaqqap, mıkrokamera jáne ózge de baılanys qurylǵylaryn paıdalanǵandar jaýapqa tartylady. Budan bólek, teorııalyq emtıhan tapsyrý quqyǵynan 1 jylǵa aıyrý múmkindigi qarastyrylǵan.
Jetinshi baǵyt – avtomektepterge qoıylatyn talaptardy kúsheıtý. Olardyń qyzmeti júrgizýshilerdi daıarlaý sapasy men azamattardyń keri baılanysy negizinde baǵalanady. Sonymen qatar bul salaǵa lısenzııalaý engizilip, sapasy tómen uıymdardyń lısenzııasyn keri qaıtaryp alý tetigi iske qosylady.
