Qaraǵandyda týrfırma klıentterin 400 myń dollarǵa «laqtyrdy»

QARAǴANDY. 17 tamyz. Qaraǵandyda «Faraon» atty týrıstik fırmanyń ústinen qozǵalǵan qylmystyq is boıynsha 400 myń dollardaı shyǵyn shekken 75 adam jábirlenýshi bolyp tanyldy. Bul týraly oblystyq prokýratýranyń baspasóz qyzmeti habarlady. Atalǵan týrfırma óziniń klıentterine Túrkııaǵa saıahattap barýǵa múmkindik beretin arzan joldama satyp, san soqtyryp ketken. Qylmystyq is «Asa iri kólemdegi alaıaqtyq» baby boıynsha qozǵaldy. Qazirgi tańda týrfırma tek 13 adamnyń ǵana aqshasyn qaıtarǵan. Búgingi kúnde kúdiktiniń sany ekeý. Olar – fırma dırektory Janar Abeýp pen kassır Álııa Gabrıel. Sondaı-aq, bul iske taǵy bir úshinshi adamnyń qatysy bary belgili bolyp otyr. Biraq tergeý isiniń múddelerine saı, onyń esimi ázirge jarııa bolmaıdy. Týrıstik agenttikter qaýymdastyǵynyń málimetinshe, «Faraon» fırmasy sala naryǵynda bes jyldaı jumys istep kelgen jáne de ol osy ýaqyt aralyǵynda ózin qyzmeti arzan operator retinde kórsetken. Qaırat Ábildınov. Derek, Qaraǵandy oblystyq prokýratýrasynyń baspasóz qyzmeti. Sýret: kommersant.ru.